ADDIS ABABA — Midowga Afrika (AU) ayaa Jimcihii si cad u diiday tallaabo kasta oo lagu aqoonsanayo Somaliland inay tahay dal madax-bannaan, isagoo mar kale adkeeyay go’aankiisa ku aaddan ilaalinta midnimada, madaxbannaanida iyo wadajirka dhuleed ee Jamhuuriyadda Federaalka Soomaaliya.
Bayaan uu soo saaray Midowga Afrika ayaa lagu sheegay in Guddoomiyaha Guddiga AU, Maxamuud Cali Yuusuf, uu “si aan mugdi ku jirin u xaqiijinayo” mowqifka ururka ee ah “in la ixtiraamo xuduudihii la dhaxlay xilligii gobannimada.”
Bayaanka ayaa lagu yiri Guddoomiyaha Guddiga AU wuxuu “si adag u diidayaa tallaabo ama hindise kasta oo lagu doonayo in Somaliland loo aqoonsado hay’ad madax-bannaan,” isagoo xusay in Somaliland ay weli tahay “qayb ka mid ah Jamhuuriyadda Federaalka Soomaaliya.”
“Isku day kasta oo lagu wiiqayo midnimada, madaxbannaanida iyo wadajirka dhuleed ee Soomaaliya wuxuu ka hor imaanayaa mabaadi’da aasaasiga ah ee Midowga Afrika, wuxuuna halis gelinayaa nabadda iyo xasilloonida qaaradda, isagoo abuuri kara tusaale khatar ah oo saameyn ballaaran leh,” ayaa lagu yiri bayaanka.
Midowga Afrika ayaa sidoo kale muujiyay “ballanqaadkiisa aan leex-leexadka lahayn” ee ku aaddan midnimada iyo wadajirka dhuleed ee Soomaaliya, iyo taageerada buuxda ee dadaallada dowladda Soomaaliya ee lagu xoojinayo nabadda, dhismaha hay’adaha dowliga ah iyo horumarinta maamul loo dhan yahay.
Israa’iil ayaa Jimcihii noqotay dalkii ugu horreeyay ee caalamka si rasmi ah u aqoonsada Somaliland inay tahay dal madax-bannaan, tallaabo dhalisay falcelin ballaaran oo siyaasadeed iyo diblomaasiyadeed.
Somaliland, oo ku dhawaaqday gooni-isu-taag 1991, ayaan helin aqoonsi caalami ah tan iyo markaas, inkasta oo ay si dhab ah u maamusho arrimaheeda siyaasadeed, maamul iyo amni. Dowladda dhexe ee Soomaaliya ayaan awood buuxda ku lahayn gobolka, halka hoggaanka Somalilandna uusan weli ku guuleysan helitaanka aqoonsi caalami ah.
Dowladda Federaalka Soomaaliya ayaa si cad u diidan aqoonsiga Somaliland, waxayna u aragtaa inay tahay qayb aan ka go’i karin dhulka Soomaaliya, iyadoo heshiis kasta ama xiriir toos ah oo lala yeesho Somaliland ku tilmaanta xadgudub ka dhan ah madaxbannaanida iyo midnimada dalka.
