Maka, Juun 9, 2025 – Madaxweynaha Hay’adda Arrimaha Diinta ee Turkiga, Prof. Dr. Ali Erbaş, ayaa magaalada Maka kula kulmay Wasiirka Arrimaha Diinta iyo Awqaafta Soomaaliya, Mukhtaar Roobow, iyo wafdi uu hoggaaminayay, sida lagu sheegay war rasmi ah oo kasoo baxay xafiiska diinta ee Turkiga.
Kulanka ayaa ka dhacay xarunta La-taliyaha Adeegyada Diinta ee magaalada Maka, xilli ay socoto gudashada Xajka. Prof. Dr. Erbaş ayaa u mahadceliyay Wasiir Roobow booqashada uu ku yimid xarunta, isagoo sidoo kale ugu hambalyeeyay munaasabadda Ciidda Carafo (Ciidul Adxaa).
Prof. Erbaş ayaa hoosta ka xarriiqay muhiimadda ay leedahay xiriirka ka dhexeeya Soomaaliya iyo Turkiga, wuxuuna yiri: “Soomaaliya waa dal Muslim ah oo aan si dhow ula shaqeyno, oo aan iskaashi la leenahay dhammaan hay’adaha dowladda, waana dal aanu si weyn u qadarinno. Sidaas darteed, booqashadaada iyo joogitaankaaga halkan waa mid aad noogu qiimo badan.”
Madaxweynaha Arrimaha Diinta ee Turkiga ayaa intaas ku daray in Aasaaska Diinta Turkiga (TDV) uu taageero siiyo ardayda Soomaaliyeed ee wax ka barata Turkiga iyo kuwa ku sugan gudaha Soomaaliya, gaar ahaan dhinaca waxbarashada. Sidoo kale, wuxuu sheegay in kumannaan qaybood oo ka mid ah xoolaha qurbaanada loo qaybiyey Soomaaliya xilliga Ciidda Carafo.
Wasiirka Arrimaha Diinta ee Soomaaliya, Mukhtaar Roobow, ayaa isaguna muujiyay farxadda uu ka qabo xiriirka adag ee ka dhaxeeya Soomaaliya iyo Turkiga, isagoo xusay in masuuliyiin badan oo ka tirsan dowladda Soomaaliya ay yihiin arday horey wax uga bartay Turkiga isla markaana af-Turki si fiican u yaqaan.
“Qur’aanno laga keenay Turkiga ayaa laga helaa masaajidda ku yaalla Soomaaliya oo dhan,” ayuu yiri Roobow. Wuxuuna uga mahadceliyay Jamhuuriyadda Turkiga kaalinta weyn ee ay kaga jirto taageerada shacabka iyo dowladda Soomaaliyeed, isagoo ku tilmaamay mid aan xadidnayn oo daacad ah.
Kulanka waxaa sidoo kale ka qayb galay Safiirka Turkiga u fadhiya Riyadh, Prof. Dr. Emrullah İşler; Ku-xigeenka Madaxweynaha Diiwaanka Diinta, Assoc. Prof. Dr. Selim Argun; La-taliyaha Adeegyada Diinta ee Riyadh, Prof. Dr. Ramazan Muslu; iyo La-taliyaha Adeegyada Diinta ee Maka, Dr. Ahmet Oğuz.
