MUQDISHO [SMN] – War kasoo baxay Hay’adda Sirdoonka iyo Amniga Qaranka (NISA), ayaa lagu sheegay in ay wada-shaqeyn la sameeyeen ciidamada milatariga Soomaaliya, isla markaana ay fuliyeen duqeymo cirka ah oo lagu beegsaday dagaalyahanno ka tirsan Al-Shabaab, kuwaasoo ka dhacay gobollada Shabeellaha Dhexe iyo Hoose, iyadoo ugu yaraan 41 xubnood oo ka tirsan kooxda Al-Shabaab la dilay, kuwaasoo ay ku jiraan xubno sar sare.
NISA ayaa shaaca ka qaaday in duqeyntii ugu horreysay ay ahayd mid lagu beegsaday koox 29 dagaalyahan oo ka tirsan Al-Shabaab oo ku sugnaa deegaanka Boos-Hareeri ee Shabeellaha Dhexe, taasoo sababtay in dhammaan xubnahaasi la dhameystiro. Duqeyn labaad oo ka dhacday deegaanka Jambaluul ee Shabeellaha Hoose ayaa iyaduna gashay 12 dagaalyahan oo kale.
War qoraal ah oo kasoo baxay NISA ayaa lagu sheegay in howlgalladani ay qayb ka yihiin dadaallo joogto ah oo lagu joojinayo awoodda kooxda Al-Shabaab, iyadoo ay sheegeen in duqeymahan ay yihiin wax weyn oo ka dhanka ah kooxda Al-Shabaab. Hay’adda sirdoonka ayaa sidoo kale dadka rayidka ah ku baraarujisay in ay ka fogaadaan meelaha ay Al-Shabaab ku dhuumaalaysanayaan, maadaama ciidamada ammaanka ay sii wadi doonaan sidii ay u beegsan lahaayeen xubnaha kooxda.
Duqeymahan ayaa imaanaya xilli uu sii kordhayay dagaalka ciidamada Soomaaliya iyo Al-Shabaab ee ka socda gobollada Shabeellaha Dhexe iyo Hoose, iyo sidoo kale Hiiraan, ka dib markii kooxda Al-Shabaab ay kordhiso weerarada ay ku qaado saldhigyada ciidamada Soomaaliya.
Dowladda Soomaaliya ayaa sheegtay in ay sii wadi doonto dagaalka ay ku dooneyso in ay burburiso goobaha ugu dambeeya ee xoogagga Al-Shabaab.
