Lambar 50, Shabeellaha Hoose – Ra’iisul Wasaaraha Xukuumadda Jamhuuriyadda Federaalka Soomaaliya, Xamsa Cabdi Barre, ayaa maanta (Sabti) saaka ka qeybgalay Salaadda Ciidda oo la oogay cutubyo ka tirsan Ciidanka Qaranka Soomaaliyeed iyo shacabka deegaanka ee ku dhaqan magaalada Lambar 50 ee gobolka Shabeellaha Hoose.
Ra’iisul Wasaaraha oo ka hadlayay salaadda kadib ayaa bulshada deegaanka uga mahadceliyey sida ay si wadajir ah ugu istaageen in cadowga looga difaaco deegaankooda. Mudane Xamsa Cabdi Barre ayaa sidoo kale muujiyey sida ay muhiimka u tahay in shacabka Soomaaliyeed ay iskaashadaan si loo xoreeyo guud ahaan dalka, gaar ahaan deegaannada gobolka Shabeellaha Hoose ee ay ka joogaan Khawaarijta.
“Maanta waxaan halkan ku joognaa inaan muujinno midnimo, iyo inaan iskaashano sidii aan uga sifeyn lahayn Khawaarijta oo ka dhex jooga deegaanada aan maanta ku jirno. Waxaan u baahanahay taageeradaada si aan u guuleysano,” ayuu yiri Ra’iisul Wasaaraha.
Ra’iisul Wasaaraha ayaa xusay in ciidamadu ay yihiin kuwa naftooda u hura difaaca dalka iyo shacabka Soomaaliyeed, wuxuuna soo dhaweeyey dadaalka iyo adkeysiga ay muujinayaan. Isagoo ka hadlayay halganka lagula jiro Khawaarijta, ayaa wuxuu ugu baaqay dhammaan shacabka Soomaaliyeed iyo ciidanka inay wadajir u garab istaagaan sidii looga xoreyn lahaa dalka Khawaarijta.
“Waxaa muhiim ah in shacabka Soomaaliyeed ee deegaanka, iyo guud ahaan dalka, ay u istaagaan sidii ay uga hortagi lahaayeen cadowga dalka. Tani waxay u baahan tahay iskaashi iyo taageero wadajir ah si loo xaqiijiyo nabadgelyo iyo xasilooni,” ayuu hadalkiisa raaciyay.
Mudane Xamsa Cabdi Barre ayaa sidoo kale ballanqaaday in dowladda Soomaaliya ay sii wadi doonto dadaalka lagu xoojinayo amniga iyo nabadgelyada, isla markaana ay ka go’an tahay in la dhammeystiro halganka lagula jiro Khawaarijta si loo xaqiijiyo barwaaqo iyo horumar dalka.
