Nairobi – Waaxda saadaasha hawada ee dalka Kenya ayaa ka digtay in roobab mahiigaan ah iyo fatahaado xooggan ay sii socon karaan, iyadoo tirada dadka ku dhintay ay kor u dhaaftay 62 qof, sida ay shaaciyeen mas’uuliyiinta.
Dalka ayaa galay wajigii hore ee xilli roobaadka dheer, waxaana dowladdu ka digtay suurtagalnimada khasaare iyo barakac kale oo ka dhasha roobabka socda.
Sida ay sheegtay Wasaaradda Arrimaha Gudaha iyo Maamulka Qaranka, magaalada caasimadda ah ee Nairobi ayaa laga diiwaan geliyay tirada ugu badan ee dhimashada fatahaadaha.
Mas’uuliyiinta ayaa sheegay in dadka dhintay ay ka mid yihiin 46 rag ah, 8 haween ah iyo 8 carruur ah. Kooxaha gurmadka degdegga ah ayaa weli wada howlaha samata bixinta iyo qiimeynta khasaaraha ka dhashay fatahaadaha ka dhacay qeybo badan oo dalka ka mid ah.
Roobab xooggan oo maalmihii la soo dhaafay ka da’ayay magaalada Nairobi ayaa sababay in biyo ay buuxiyaan waddooyin, guryo iyo goobo ganacsi oo ku yaalla xaafado kala duwan.
Gobollo kale oo dalka ka mid ah ayaa sidoo kale laga soo sheegay dhimasho la xiriirta fatahaadaha. Gobolka Bari waxaa laga diiwaan geliyay 17 dhimasho ah, halka gobolka Rift Valley laga soo sheegay 7 qof oo ku dhintay fatahaadaha.
Sidoo kale laba qof ayaa ku dhintay gobolka Nyanza iyo laba kale oo ku dhintay xeebta dalka, halka gobollada dhexe laga diiwaan geliyay hal dhimasho.
Wasaaradda Arrimaha Gudaha ayaa sheegtay in hay’adaha dowladda iyo kooxaha gurmadka degdegga ah ay weli ku sugan yihiin goobaha ay fatahaaduhu saameeyeen, si ay u caawiyaan qoysaska barakacay isla markaana ay u dardargeliyaan howlaha samata bixinta iyo gargaarka.
Maamulka ayaa ugu baaqay dadka ku nool meelaha ay fatahaaduhu saameeyeen, gaar ahaan kuwa ku dhow webiyada iyo dhulka hooseeya, inay muujiyaan feejignaan dheeri ah isla markaana raacaan talooyinka badbaadada inta ay socdaan howlaha gurmadka.
