Muqdisho, Soomaaliya – May 20, 2025 – Safiirka cusub ee Boqortooyada Ingiriiska u qaabilsan Jamhuuriyadda Federaalka Soomaaliya, Charles King, ayaa si rasmi ah u yimid magaalada Muqdisho, isaga oo si buuxda u bilaabaya shaqadiisa diblomaasiyadeed ee dalka.
Safiir King ayaa hogaamin doona safaaradda Boqortooyada Ingiriiska ee Soomaaliya, waxaana diiradda lagu saarayaa xoojinta xiriirka laba geesoodka ah ee u dhaxeeya labada dal, gaar ahaan dhinacyada maamul wanaagga, horumarka, amniga, iyo gurmadka bini’aadantinimo.
Markii uu soo degay garoonka Aadan Cadde ee Muqdisho, Safiir Charles King ayaa sheegay:
“Waxaan u arkaa sharaf weyn in aan noqdo Safiirka Boqortooyada Ingiriiska ee Soomaaliya. Waxaan rajeynayaa in aan si dhow ula shaqeeyo saaxiibadayda Soomaaliyeed si aan u taageerno nabadda, horumarka, iyo barwaaqada. Meel dheer ayaan wada gaari karnaa. Waad mahadsan tihiin – aan horey u soconno wadajir.”
Boqortooyada Ingiriiska ayaa sheegtay inay weli ka go’an tahay taageerada ay siiso Soomaaliya, iyada oo garab istaagta dadaallada lagu xasilloonaynayo laguna kobcinayo horumarka dalka.
Safiirka cusub ayaa la filayaa inuu la kulmo madaxda dowladda Federaalka iyo kuwa dowlad-goboleedyada si loo sii adkeeyo iskaashiga dhow ee labada dal.
Safaaradda Ingiriiska ee Soomaaliya ayaa door muhiim ah ka ciyaarta arrimaha horumarinta, amniga, iyo gurmadka degdega ah ee ka jira gudaha dalka.
