MUQDISHO (SMN) – Dowladda Soomaaliya oo warsaxaafadeed soo saartay ayaa sheegtay in howlgal qorsheysan ay ku dishay sarkaal sare oo ka tirsanaaa kooxda Al-Shabaab, kadib markii lagu beegsaday howlgal ka dhacay deegaanka Kuunyo Barrow ee Gobolka Shabeellaha Hoose.
Magaca horjoogaha la dilay ayaa waxaa lagu sheegay Maxamed Mire Jaamac (Abuu Cabdirahmaan) oo ay dowladdu sheegtay inuu Al-Shabaab u qaabilsanaa gobollada.
Warsaxaafadeedka ayaa u qornaa sidatan;-
Howlgal gaar ah oo si weyn loo qorsheeyay oo ay iska kaashadeen Ciidanka Qaranka iyo Saaxiibada Caalamka oo ka dhacay deegaanka Kuunyo Barrow ee Gobolka Shabeellaha Hoose ayaa lagu qaarajiyay Horjooge Maxamed Mire Jaamac (Abuu Cabdirahmaan) oo ahaa horjoogihii Khawaarijta u qaabilsanaa Gobollada.
Horjooge Abuu Cabdirahmaan ayaa ka mid ahaa horjoogeyaasha ugu sareeya Khawaarijta 15-kii sano ee ugu dambeysay, asagoo horjooge ka soo noqday qaybaha boobka iyo baadda shacabka iyo qaybta maleeshiyaadka, waxaana lagu xasuustaa inuu ahaa aas-aasihii Jabhadii Caanoole oo si qasab ah ugu biirtay Khawaarijta Al-Shabaab 2009-kii.
Dowladda Soomaaliya iyo Saaxiibada Caalamka ayaa in muddo ah ku raad-joogay horjoogahaan iyo horjoogayaal kale oo dhiigyo cab ah, kuwaas oo dhammaantood la haayo macluumaadkooda oo dhamaystiran.
Tallaabadan waxay qayb ka tahay qorshaha dowladda Soomaaliya ee Khawaarijta looga ciribtirayo deegaannada ay ku hareen, sidoo kalana looga dulqaadayo ciqaabta iyo dhibaatada ay ku hayaan bulshada Soomaaliyeed.
