MUQDISHO, Soomaaliya [SMN] – Maareeyaha Hay’adda Duulista Rayidka Soomaaliyeed, Axmed Macalin Xasan, ayaa maanta faahfaahin ka bixiyey sababtii keentay shil diyaaradeed oo ka dhacay garoonka diyaaradaha Aadan Cadde ee magaalada Muqdisho.
Axmed Macalin Xasan ayaa sheegay in shilka uu ka dhacay kadib markii diyaaradda ay la kulantay cilad farsamo oo la xiriirta lugta hore uu u bixi waysay xili ay Garoonka Baydhabo ku degi rabtay, taas oo sababay in ay dib ugu soo laabato garoonka Muqdisho oo xabadka lagu dejiyay.
Wuxuu sidoo kale xaqiijiyey in ciidamada amniga iyo saraakiisha garoonka ay si degdeg ah u bilaabeen dadaallada badbaadinta rakaabka oo illaa 22 qof gaarayay kuwaasoo ah shaqaale UN, kuwaasoo dhamaantood badbaadey.
Maareeyaha ayaa caddeeyey in ilaa iyo hadda aysan jirin wax khasaare nafeed oo ka dhashay shilka, laakiin uu jiro dhaawac yar oo ka soo gaaray qaar ka mid ah rakaabka iyo shaqaalaha diyaaradda. Wuxuu sidoo kale sheegay in baaritaanno dheeri ah ay socdaan si loo ogaado sababaha dhabta ah ee keentay ciladda.
Dhacdadani ayaa markale muujineysa baahida loo qabo in la xoojiyo tayada iyo amniga diyaaradaha ka shaqeeya garoonka Aadan Cadde, si looga fogaado shilal dheeraad ah oo waxyeello u geysta dadka iyo hantida.
