MADRID, Spain – Dowladda Spain ayaa ansixisay hal milyan oo euro oo deeq ah si loo taageero Hawlgalka Midowga Afrika ee Taageerada iyo Xasillinta Soomaaliya (AUSSOM), sida ay ku sheegeen saraakiisha ka dib kulanka Golaha Wasiirrada ee dalkaasi.
Madrid ayaa sheegtay in lacagtaasi ay muhiim tahay maadaama xasillooni darrada Soomaaliya ay khatar ku noqon karto Geeska Afrika, isla markaana ay xiriir la yeelan karto dhibaatooyinka ka taagan regiinka Sahel, oo muhiimad gaar ah u leh Spain qayb ka mid ah istaraatiijiyadda Spain–Afrika 2025–2028.
Saraakiisha Spain ayaa intaa ku dartay in AUSSOM ay la tacaalaysay xannibaad dhaqaale, halka taageerada Spain ay ka hortagi doonto in hawlgalka uu istaago ama uu lumiyo awoodda uu ku shaqeynayo.
Sida ay sheegtay La Moncloa, deeqdan ayaa ka qayb qaadan doonta:
- Xoojinta qaab-dhismeedka amniga Afrika
- Dardar-gelinta dhismaha dowlad Soomaaliyeed oo mid ah oo xasilloon
- Hubinta in AUSSOM ay sii waddo howlgalkeeda iyadoo ay jiraan caqabado amni oo weli xooggan
Taageerada loo fidiyay Soomaaliya ma ahan tan keliya ee dowladda Spain ansixisay. Golaha Wasiirradu wuxuu sidoo kale oggolaaday deeqo cusub oo loo dirayo hay’ado hoos yimaada Qaramada Midoobay iyo Ururka Iskaashiga iyo Horumarinta Dhaqaalaha (OCDE) si loo taageero barnaamijyada horumarinta caalamiga ah.
