Kivu, Congo – Ugu yaraan 10 qof ayaa ku dhintay halka tiro kale oo badanna ay la’ yihiin kadib dhul-go’ ka dhacay goob macdan laga qodo oo ku taalla Rubaya, gobolka Waqooyi Kivu. Dhul-go’gan ayaa dhacay aroornimadii Sabtidii , kaddib roobab xooggan oo ka da’ay deegaanka.
Wararka maxalliga ah ayaa sheegaya in ugu yaraan 12 mayd la helay duhurnimadii, kuwaas oo ay ku jiraan lix carruur ah. Goobjoogayaal ayaa sheegay in dhowr guri oo ku dhow goobta macdanta ay gebi ahaanba ku hoos duugmeen ciidda iyo dhagxaanta, halka dad dhaawac ah loo qaaday xarumaha caafimaadka ee deegaanka.
Dhul-go’gu wuxuu ka bilowday meel u dhow godadka macdanta ee Gakombe, kadibna wuxuu ku fatahay meelaha hoose ee ay ka shaqeeyaan macdan-qodayaasha yaryar ee loo yaqaan artisanal miners. Dadka deegaanka iyo macdan-qodayaasha kale ayaa weli ku hawlan raadinta dad badbaaday iyo soo saarista maydadka ku hoos jira burburka, iyagoo adeegsanaya qalab aad u kooban.
Musiibadan ayaa timid kaddib markii saddex maalmood ka hor ay isla goobtan ka dhacday masiibo kale oo ay dowladdu sheegtay inay ku dhinteen in ka badan 200 qof. Bishii Janaayo ee sanadkan, dhacdo kale oo la mid ah ayaa lagu soo warramay inay dishay in ka badan 400 qof.
Aagga Rubaya ayaa hodan ku ah macdano qiimo leh sida coltan, cassiterite, dahab iyo tourmaline, waxaana tan iyo 2024 gacanta ku haya fallaagada M23, taas oo sii adkastay xaaladda amni iyo badbaado ee goobaha macdanta ee bariga Congo.
