BOOSAASO (SMN) – Faah-faahin dheeraad ayaa kasoo baxaysa dagaal dhexmaray ciidamada difaaca Puntland iyo kooxaha Daacish oo saaka weerar ku qaaday saldhig ay ku sugnaayeen ciidamada ammaanka ee maamulkaasi.
Weerarka oo ku bilowday qaraxyo ayaa waxaa xigay dagaal toos ah, ayaa dhaliyay khasaare xoogleh oo soo kala gaaray labada dhinac.
Saraakiisha ciidamada difaaca Puntland ayaa xaqiijiyey in saaka la dilay 8 kamid ah xubnaha kooxda Daacish oo Ajaaniib ahaa, ka dib dagaal qaraxyo ismiidaamin ah ay kooxda Daacish u adeegsadeen oo ay la galeen ciidanka Puntland.
Ujeedka weerarka kooxdan ayaa ahaa in ay howlgalka HILAAC iska joojiyaan, iyagoo doonayay in ay bartilmaameedsadaan hubka culus iyo Saadka ciidanka, balse laga hortagay.
Wararka ayaa intaasi kusii daray in ciidamada Puntland ay ka dhinteen askar kor u dhaafeyso illaa 10, waxaana dhaawacmay tiro kale oo intaasi ka badan.
Halkan hoose ka dhageyso wareysi ay Shabelle la yeelatay wasiirka warfaafinta Puntland oo ka warbixiyay dagaalka ay ciidamadooda la galeen kooxda Daacish.
