MUQDISHO — Wasaaradda Awqaafta iyo Arrimaha Islaamka ee Xukuumadda Federaalka Soomaaliya ayaa soo saartay amar ku wajahan dhammaan imaamyada iyo khadiibyada masaajidda dalka, iyada oo faraysa in khudbada Jimcaha ee maanta, 02/01/2026, looga hadlo ahmiyadda midnimada iyo wadajirka ummadda Soomaaliyeed, iyo khatarta ay leedahay faragelinta Israa’iil.
Wasaaraddu waxay sheegtay in go’aankan uu yimid xilli ay jiraan xaalado siyaasadeed iyo amni oo xasaasi ah, kuwaas oo u baahan in shacabka Soomaaliyeed lagu baraarujiyo muhiimadda ay leedahay isku duubnida, is-fahamka iyo ilaalinta madax-bannaanida dalka.
Sida lagu sheegay war-saxaafadeedka wasaaradda, imaamyada iyo khadiibyada masaajidda ayaa lagu boorriyay in khudbadahooda ay ku adkeeyaan baahida loo qabo midnimo qaran, ka fogaanshaha kala-qaybsanaanta, iyo ka hortagga faragelinta shisheeye ee wax u dhimaysa danaha iyo xasilloonida Soomaaliya.
Wasaaradda Awqaafta iyo Arrimaha Islaamka ayaa mar kale ku baaqday in culimada iyo hoggaamiyeyaasha diinta ay door muuqda ka qaataan wacyigelinta bulshada, iyaga oo adeegsanaya masaajidda sidii meel lagu xoojinayo nabadda, wadajirka iyo difaaca qiyamka ummadda Soomaaliyeed.
