Qaahira — Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali, ayaa maanta oo Jimce ah gaaray magaalada Qaahira ee caasimadda dalka Masar, halkaas oo uu ku hoggaaminayo wafdiga Soomaaliya ee ka qaybgalaya Shirka Wasiirrada ee Labaad ee Madasha Iskaashiga Ruushka iyo Afrika.
Shirkan diblomaasiyadeed oo heer sare ah, oo soconaya laba maalmood kana dhacaya 19 illaa 20-ka Diseembar, ayaa isu keenaya Wasiirrada Arrimaha Dibadda ee dalalka Afrika iyo mas’uuliyiin sare oo ka kala socda Ruushka iyo ururro goboleedyo kala duwan. Ujeeddada shirku waa xoojinta xiriirka diblomaasiyadeed, kor u qaadidda iskaashi wadajir ah, iyo ka doodista caqabadaha iyo fursadaha ka jira jawiga juqraafi-siyaasadeed ee hadda taagan.
Shirka Qaahira ayaa daba socda shirkii wasiirrada ee ugu horreeyay ee madashan, kaas oo lagu qabtay magaalada Sochi ee dalka Ruushka bishii Nofeembar 2024. Kulankan labaad waxaa diiradda lagu saarayaa qiimeynta horumarka laga gaaray heshiisyadii hore iyo dejinta yoolal wax ku ool ah oo la hirgelin doono sanadka soo socda, si iskaashigu u keeno natiijooyin muuqda oo ay ka faa’iideystaan dhammaan dalalka xubnaha ka ah.
Ajendaha shirka labada maalmood ah waxaa ka mid ah ballaarinta ganacsiga, soo jiidashada maalgelinta tooska ah ee shisheeye, iskaashiga istiraatiijiga ah ee dhinaca tamarta, iyo horumarinta kaabeyaasha dhaqaalaha. Qodobadan ayaa ah kuwo mudnaan gaar ah u leh Soomaaliya iyo dalal kale oo Afrikaan ah oo doonaya dardar-gelinta kobaca dhaqaale.
Ka qaybgalka firfircoon ee Soomaaliya ee shirka ayaa muujinaya sida ay Dowladda Federaalka uga go’an tahay kala-duwanaanshaha saaxiibbada caalamiga ah, kor u qaadista diblomaasiyadda dhaqaalaha, iyo helitaanka taageero iyo maalgelin lagu dardargelinayo dib-u-dhiska qaranka.
