MANDHEERA – Waxaa magaalada Mandheera ee waqooyi bari Kenya ka taagan xiisad amni iyo mid siyaasadeed, taasoo salka ku haysa joogitaanka ciidamada Jubbaland oo la sheegay inay si aan sharci ahayn uga tallaabeen xadka Soomaaliya iyo Kenya.
Dadka deegaanka ayaa ka cabanaya in ciidamadaasi ay qabsadeen dhul beereed, isla markaana ay cabsi gelin ku hayaan shacabka deegaanka.
Banaanbaxyo ayaa laga dhigay magaalada Mandheera, gaar ahaan aagga BP1, halkaas oo dadka deegaanka ay sheegeen in ciidamo ka tirsan Jubbaland ay muddo ka badan bil halkaas deganaayeen.
Qaar kamid ah dadka deegaanka ayaa sheegay in ay ka barakaceen guryahooda, halka qoysas kale ay u guureen dhinaca magaalada Suftu ee Itoobiya si ay uga badbaadaan qalalaasaha jira.
Fatuma Cabdullaahi Xuseen, oo kamid ah dadka deegaanka, ayaa sheegtay in qoyskeeda uu cabsi darteed uga baxay deegaanka, halka Habiba Alasow Maow ay sheegtay in carruurteedu aysan iskuul tegin tan iyo markii ay ciidamadu yimaadeen, arrintaas oo saameyn ku yeelatay waxbarashada ilmaha.
Mas’uuliyiinta gobolka Mandera ayaa beeniyay in ciidamo shisheeye gudaha ugu jiraan Kenya.
Agaasimaha amniga gobolka, Solomon Chepotone, ayaa sheegay in aysan jirin wax caddeyn ah oo muujinaysa in ciidamo ka socda Jubbaland ay gudaha Mandera joogaan, inkastoo dadka deegaanka ay si cad u muujinayaan baaqooda ah in ciidamadaasi laga saaro.
Dhanka kale, siyaasiyiin iyo madax hore ayaa si adag uga hadlay arrintan. Senator Ali Roba ayaa ku eedeeyay ciidamada Jubbaland inay jebiyeen xuduudaha Kenya, isagoo sheegay in ciidamadaasi halis ku yihiin amniga gobolka.
Guddoomiyihii hore ee Maxkamadda Sare, David Maraga, ayaa isna dowladda dhexe ugu baaqay inay si degdeg ah wax uga qabato arrintan.
Ugu dambeyntii, arrintan ayaa dhalisay walaac baahsan oo ku saabsan amniga xuduudaha Kenya iyo xiriirka siyaasadeed ee u dhexeeya Kenya iyo maamulka Jubbaland.
Dadka deegaanka ayaa weli codsanaya in ciidamadaasi laga saaro, si ay ugu laabtaan nolol maalmeedkooda, carruurtuna ugu laabtaan iskuulladooda si nabad ah.
