Dhusamareeb, Galgaduud — Wararka ka imaanaya gobolka Galgaduud ee bartamaha Soomaaliya ayaa sheegaya in xiisad culus ay ka taagan tahay deegaano dhowr ah, kaddib markii dhawaan halkaasi si naxdin leh loo dilay hooyo iyo carruurteed, falkaas oo la rumeysan yahay inuu salka ku hayo aano qabiil.
Dhacdadan argagaxa leh ayaa gilgishay guud ahaan bulshada deegaanka, iyadoo ay si adag u cambaareeyeen odayaasha dhaqanka, culimada, iyo dhalinyarada. Dad badan ayaa ku baaqay in si degdeg ah cadaaladda loo horkeeno kuwii ka dambeeyay falkan bini’aadanimada ka baxsan.
Tan iyo markii ay dhacdadu dhacday, wararku waxay sheegayaan in dagaal qabiil uu si tartiib ah ugu sii fidayo qaybo ka mid ah gobolka, gaar ahaan deegaanada u dhexeeya labada beelood ee ay colaadu dhexmartay. Waxaa la soo sheegayaa in labada dhinac ay bilaabeen ururinta hubka iyo isu diyaargarow dagaal kale, taas oo cabsi weyn ku abuurtay dadka rayidka ah.
Waddooyin muhiim ah ayaa la sheegay inay xirmeen, halka boqolaal qoys ay bilaabeen barakac degdeg ah, iyagoo ka cararaya colaadda sii xoogeysaneysa.
Odayaasha dhaqanka iyo waxgaradka deegaanka ayaa hadda ku baaqaya in la joojiyo dhiigga daadanaya, ayna muhiim tahay in lagu laabto miiska wadahadalka iyo dib-u-heshiisiinta. Sidoo kale, culimada iyo ururrada bulshada rayidka ah ayaa soo jeediyay in la dhiso guddi nabadeed oo dhexdhexaad ah si loo soo afjaro colaadda sii fidaysa.
Dhanka kale, maamulka Galmudug iyo dowladda federaalka Soomaaliya ayaa lagu dhaliilay in aysan weli si muuqata u faragelin xaaladda, xilli dadka deegaanka ay codsanayaan in la keeno ciidamo nabadeyn ah iyo in la qaado tallaabo adag oo lagu xakameynayo hubka sharci darrada ah ee faraha badan ee deegaanka ku jira.
Qaar ka mid ah dadka deegaanka ayaa ku tilmaamay colaadda socota “mid lagu burburinayo nolosha, hantida iyo mustaqbalka carruurta Soomaaliyeed,” iyagoo ugu baaqay dhinacyada is haya inay garowsadaan in dagaalka qabiilka uu yahay dhib aan cidina ku guuleysan karin.
Dilkii lagu xasuuqay hooyada iyo carruurteeda ayaa noqday calaamad muujineysa heerka uu gaaray colaadda qabiilka ee Galgaduud, taas oo sii hurineysa dhaawacyo hore oo bulshada deegaanka ka muuqday.
Shacabka Galmudug ayaa cod dheer ku dalbanaya in la joojiyo aargoosiga iyo colaadda, lana hormariyo wadahadal, isu tanaasul iyo nabad waarta.
