MUQDISHO [SMN] – Xildhibaan Maxamed Xasan Murjaan, oo kamid ah Mudanayaasha Barlamanka Federaalka Soomaaliya, ayaa si adag uga hadlay xaaladda taageerada dowladda Federaalka ee Puntland oo dagaal kula jirta kooxda Daacish.
Xildhibaanka oo wareysi siiyay Warbaahinta Shabelle waxa uu sheegay in dowladdu ay ku jahwareersan tahay cidda ay taageerayso, iyadoo Puntland ay halgan adag kula jirto kooxda Daacish.
Murjaan waxa uu tilmaamay in ficil la’aanta dowladda ay keentay in ay ka shakiyaan taageerada Puntland, iyadoo khilaafka siyaasiga ah ee u dhexeeya dowladda iyo Puntland uu sabab u yahay in dowladdu ay ka tagtay inay si toos ah ugu garab istaagto dagaalka ka dhanka ah Daacish.
“Waxa ay u muuqataa in dowladda ay ilowday taageerada ay Puntland u baahantahay, gaar ahaan xilligan ay kooxaha argagixisada sida Daacish si xowli ah u soo saameynayaan gobolka,” ayuu yiri Xildhibaan Murjaan.
Wuxuu sidoo kale ku baaqay in dadka Soomaaliyeed ay isku waafaqaan dagaalka ka dhanka ah Al-Shabaab iyo Daacish, iyagoo ka shaqeynaya danta guud ee dalka, halka dowladdu ay ku mashquulsan tahay dano siyaasadeed gaar ah.
Eedeymaha ayaa si weyn uga soo horjeeda dowladda, iyadoo siyaasiyiinta mucaaradka ay inta badan ku andacoonayaan in dowladda ay si joogto ah uga gaabisay garab istaagga Puntland ee dagaalka ka dhanka ah kooxda Daacish. Waxay tilmaamayaan in dowladdu ay mar walba ka fogaato inay gacan ka geysato xaaladaha amni ee Puntland, iyadoo ka fogaanaysa taageero buuxda oo ay Puntland u baahan tahay.
Dagaalka ka dhanka ah Daacish iyo Al-Shabaab ayaa weli ah mid aad u xiisaha badan, waxaana hadda loo baahan yahay in la isku duubo si loo xoojiyo dadaallada ka dhanka ah kooxahaas, oo khatar ku haya amniga guud ee dalka.
