BOOSAASO (SMN) – Faah faahino dheeraad ah ayaa waxaa laga helayaa howl-gal ay xalay ciidamada ammaanka Puntland ka sameeyeen gudaha magaalada Boosaaso ee xarunta gobolka Bari, kaas oo lagu xaqiijinayey ammaanka guud ee magaaladaasi.
Howl-galka oo ahaa mid qorsheysan ayaa waxaa lagu soo qabtay rag burcad ah oo u dhac u geysanayey dadka shacabka ah ee ku dhaqan gudaha magaalada Boosaaso.
Laamaha ammaanka ayaa shaaca ka qaaday in ragga lasoo qabtay ay wax ku dhacayeen Toorey, isla-markaana ay dhaawacyo u geysteen dad shacab ah.
Taliska qeybta Booliska Gobalka Bari ayaa dhankiisa shaaciyey in ragan qabashadooda ay iska kaashadeen shacabka Boosaaso iyo ciidamada Booliska ee ka howl-gala halkaasi.
