BARDAALE (SMN) – Wararka ka imaanaya gobolka Baay ayaa sheegaya in maanta shil gaari oo geystay khasaare kala duwan uu ka dhacay duleedka degmada Bardaale ee gobolkaasi
Shilka ayaa yimid kadib markii uu rogmaday gaari Caasi ah oo ay la socdeen dad shacab ah, waxaana ka dhashay dhimasho iyo dhaawac.
Inta la xaqiijiyay ugu yaraan 3 qof ayaa ku dhintay shilkan baabuur, halka ay ku dhaawacmeen 2 kale oo kamid ah rakaabkii la socday gaariga rogmaday.
Dadka ku dhaawacmay shilkan ayaa waxaa sidoo kale lagu soo warramayaa in la geeyay magaalada Baydhabo, halkaas oo haatan lagu daaweynayo.
Sidoo kale ciidamada ammaanka oo goobta gaaray ayaa gacanta ku dhigay wadihii gaariga, si baaris loogu sameeyay dhacdadaasi, maadaama ay sababtay dhimasho iyo dhaawac.
Inta badan waddooyinka isku xira gobollada dalka ayaa waxaa ka dhaca shilal gaari oo khasaare sababa, waxaana loo sababeeyaa burburka weli ka jira jidadka iyo darawaallada oo si xawli u kaxeeya gaadiidka, xilliyada u kala gooshayaan magaalooyina waa weyn.
