LUUQ (SMN) – Wararka naga soo gaaraya gobolka Gedo ayaa sheegaya in maanta dagaal culus uu dib iga qarxay gudaha degmada Luuq ee gobolkaasi, kaas oo u dhexeeyo maleeshiyaadkii dhowaan ku dagaalamay halkaasi.
Dagaalka ayaa lagu soo warramayaa inuu ka dhacay duleedka bari ee degmadaasi, waxaana ka dhashay khasaare isugu jiro dhimasho iyo dhaawac.
Inta la xaqiijiyay waxaa dagaalka maanta ku dhintay ugu yaraan 6 qof, halka ay ku dhaawacmeen tiro intaasi ka badan.
Xaaladda ayaa haatan ah mid aad u kacsan, mana jiro wax hadal ah oo kasoo baxay maamulka degmada oo ku aadan dagaalka saaka dib uga qarxay degmadaasi.
