WASHINGTON – Dowladda Mareykanka ayaa si rasmi ah u dhaqan gelisay canshuur dhan 3.5% oo lagu soo rogay lacagaha xawaaladaha ah ee loo diro dalalka dibadda, taasoo si weyn u saameyn doonta malaayiin qoys oo ay ku jiraan kuwa Soomaaliyeed, kuwaasoo nolol maalmeedkooda ku tiirsan lacagaha ay usoo diraan qoysaskooda dibadda ku nool.
Canshuurtaan cusub ayaa qayb ka ah siyaasadda dhaqaale ee lagu magacaabo “One, Big, Beautiful Bill”, taasoo uu saxiixay madaxweynihii hore ee Donald Trump bishan. Ujeeddada laga leeyahay waxay tahay in la kordhiyo dakhliga gudaha Mareykanka, balse dhaleeceyn xooggan ayaa ka imaneysa hay’adaha u dooda xuquuqda muhaajiriinta iyo dowladaha saboolka ah ee dunida saddexaad.
Sida laga soo xigtay Center for Global Development (CGD), tallaabadan waxay keeni kartaa hoos u dhac dhan 5.6% ee lacagaha loo diro dalalka soo koraya, taasoo micnaheedu yahay in dalal ay ka mid yihiin Soomaaliya, Hindiya, iyo Mexico ay lumin doonaan balaayiin dollar sanad walba.
Sanadkii 2023, Soomaalida qurbaha ku nool ayaa dalka usoo diray lacag dhan $1.73 bilyan, taasoo ka badan dhammaan deeqaha horumarineed iyo gargaar ee ay Soomaaliya ka heshay beesha caalamka. Lacagtan ayaa ah laf-dhabarta nolosha malaayiin qoys Soomaaliyeed, gaar ahaan xilliyada ay jiraan abaaraha, colaadaha iyo sicir-bararka joogtada ah.
Canshuurta cusub waxay ku soo beegmaysaa iyadoo Mareykanku hoos u dhigay gargaarkii uu siiyo Soomaaliya, isaga oo jaray in ka badan $60 bilyan, taasoo keentay in la waayo ku dhowaad 40% ka mid ah caawimadii horey uga imaan jirtay dowladda Mareykanka.
Hay’adaha samafalka sida Oxfam ayaa ka digaya in canshuurtaasi ay si toos ah u dhaawici doonto boqolaal kun oo qoysas nugul ah.
Intii lagu jiray abaartii halista ahayd ee 2011-kii, xawaaladaha ayaa door muhiim ah ka qaatay badbaadinta nolosha dadka Soomaaliyeed. Hadda, siyaasaddan cusub waxay u muuqataa mid dhaawacaysa habkaas dabiiciga ah ee dadku isku caawiyo.
