Garowe, Puntland — Maamulka Puntland ayaa ku dhawaaqay in uu magaalada Garowe geeyay in ka badan 300 askari oo cusub oo dhawaan tababar ku dhammeystay dugsiga ciidamada ee Carmo, si loo xoojiyo amniga iyo la-dagaallanka dambiyada sii kordhaya ee caasimadda maamulka.
Saraakiil amni ayaa sheegay in ciidamadaasi cusub ay yihiin dhalinyaro jaamacado iyo dugsiyo sare ka baxay, kuwaas oo loo soo xulay tababarka si hufan oo tartan ah. Askartan ayaa la sheegay in si buuxda loo howlgeliyay, iyadoo aan loo oggolaan fasax toddobaadyada soo socda, si ay diiradda u saaraan sugidda amniga magaalada.
Maamulka Puntland ayaa ciidanka ku taageeray gaadiid, hub iyo xarumo la casriyeeyay, taasoo qayb ka ah dadaal ballaaran oo lagu tayeynayo laguna dib-u-habeynayo booliska Puntland.
Madaxweynaha Puntland Siciid Cabdullaahi Deni ayaa sheegay in tallaabadan ay muujineyso go’aanka dowladdiisa ee ah in la dhiso ciidan boolis oo xirfad leh, anshax leh, isla markaana u adeega shacabka.
Wuxuu xusay in qaar ka mid ah caqabadihii amni ee dhawaan jiray ay sabab u ahaayeen dhaqan xumo iyo ku takri-fal awood oo ay sameeyeen qaar ka mid ah xubnaha amniga, kuwaas oo lagu eedeeyay dambiyo iyo isticmaalka maandooriyaha.
“Ujeeddadu waa in aan helno boolis aqoon leh, dad u adeegaya bulshada, isla markaana ilaaliya xasiloonida magaalooyinka Puntland,” ayuu yiri Madaxweyne Deni.
Ilo-wareedyo gudaha ah ayaa sidoo kale sheegay in Isu-tagga Imaaraadka Carabta (UAE) uu siiyo Puntland taageero dhaqaale iyo mid qalabeyn, oo qayb ka ah qorshaha lagu dib-u-habeynayo booliska, gaar ahaan bixinta mushaaraadka iyo agabka tababarka.
Bilihii la soo dhaafay, magaalada Garowe iyo qaybo kale oo ka tirsan Puntland ayaa la kulmay falal amni darro ah iyo dhacdooyin hubeysan oo goos-goos ah.
Todobaadkan, Taliyaha Booliska Puntland Jen. Mumin Cabdi Shire ayaa uga digay shacabka in aanay hub si sharci darro ah u qaadan, isagoo sheegay in cid kasta oo lagu qabto ay wajahidoonto tallaabo sharci ah, taasoo muujineysa sida maamulka Deni uu dib ugu soo celinayo nidaamka iyo kala dambeynta gudaha Puntland.
