MUQDISHO – Wasiirka Arrimaha Dibadda iyo Iskaashiga Caalamiga ah ee Soomaaliya, Mudane Cabdisalaam Cabdi Cali, ayaa Isniintii xafiiskiisa ku qaabilay Safiirka Dowladda Turkiga ee Jamhuuriyadda Federaalka Soomaaliya, Mudane Alper Aktaş, iyaga oo ka wada hadlay siyaasad lagu xoojinayo xiriirka walaaltinimo ee labada dal.
Kulankan, oo ka dhacay xarunta Wasaaradda Arrimaha Dibadda ee Muqdisho, ayaa diiradda lagu saaray sidii loo horumarin lahaa yoolalka wadajirka ah, loona sahmin lahaa fursado iskaashi oo joogto ah, isla markaana lagu xoojinayo xiriirka istiraatiijiga ah ee Soomaaliya iyo Turkiga.
Wasiir Cabdisalaam ayaa carabka ku adkeeyay sida ay Soomaaliya u qadarinayso taageerada joogtada ah ee Turkiga ee dhinacyada nabadeynta, gargaarka bani’aadamnimo, iyo dhisidda awoodda hay’adaha dowladda, halka Safiirka Turkiga uu muujiyay xiisaha dalkiisa ee kordhinta iskaashiga si ay u faa’iideystaan labada dal iyo shacabka.
Kulankan ayaa qeyb ka ah dadaallada diblomaasiyadeed ee Soomaaliya ee lagu xoojinayo iskaashiga caalamiga ah iyo taageerada xasiloonida gobolka.
