MUQDISHO – Ku-xigeenka Xoghayaha Fulinta ee Urur-goboleedka IGAD, Mohamed Abdi Ware, ayaa kulanro isdaba-joog ah la yeeshay saaxiibbo caalami ah oo muhiim ah, kuwaas oo diiradda lagu saaray horumarinta nabadda, xasilloonida iyo horumarka Soomaaliya iyo guud ahaan gobolka.
Ku-xigeenka Xoghayaha Fulinta ayaa la kulmay Safiirka Boqortooyada Ingiriiska u fadhiya Soomaaliya, Charles King, iyadoo wada-hadallada ay xooga saareen nabadda iyo amniga, dib-u-heshiisiinta, dhismaha dowladnimada iyo horumarka. Dowladda UK ayaa weli ah saaxiib muhiim ah oo gobolka ah, isla markaana ka mid ah waddamada hormuudka ka ah arrimaha gobolka ee Golaha Ammaanka ee Qaramada Midoobay.
Sidoo kale, Mohamed Abdi Ware ayaa kulan la yeeshay Safiirka Midowga Yurub ee Soomaaliya, Francesca Di Mauro, iyadoo dib loo adkeeyay iskaashiga xooggan ee IGAD iyo Midowga Yurub ee ku aaddan nabadda iyo amniga, la-tacaalidda isbeddelka cimilada, adkaysiga bulshada, iyo arrimaha socdaalka.
Kulanka saddexaad, Ku-xigeenka Xoghayaha Fulinta ayaa la yeeshay Justin Davis, Ku-simaha Safiirka (Chargé d’Affaires) ee Safaaradda Mareykanka ee Soomaaliya, iyadoo diiradda lagu saaray nabadda iyo amniga, awood-siinta dhalinyarada, iyo xoojinta nolol-maalmeedka bulshooyinka nugul.
Dowladda Mareykanka ayaa weli ah saaxiib istiraatiiji ah oo muhiim u ah Soomaaliya iyo IGAD, gaar ahaan dhinacyada amniga, horumarinta, iyo xasillinta gobolka.
