Baydhabo – Hoggaamiyaha ku meel gaarka ah ee Dowladda Koonfur Galbeed, Mudane Jibriil Cabdirashiid Xaaji Cabdi, ayaa kormeer shaqo ku tagay xarunta maamulka degmada Baydhabo ee gobolka Baay, halkaas oo kusoo dhoweeyey Guddoomiyaha degmada iyo Duqa magaalada, Mudane Cabdulaahi Cali Watiin.
Kormeerkan ayaa ujeedkiisu ahaa hubinta habsami u socodka howlaha maamulka degmada, dardargelinta adeegyada bulshada, iyo xoojinta wada shaqeynta ka dhaxeysa maamulka iyo shacabka deegaanka.
Intii uu kormeerka ku guda jiray, Hoggaamiyaha ayaa warbixinno faahfaahsan ka dhageystay masuuliyiinta degmada, kuwaas oo la wadaagay xaaladda guud ee maamulka, adeegyada bulshada, iyo caqabadaha jira. Sidoo kale, wuxuu indha-indheyn ku sameeyay xarumaha muhiimka ah ee degmada si uu u qiimeeyo heerka adeeg bixinta.
Mudane Jibriil Cabdirashiid Xaaji Cabdi ayaa ku bogaadiyay maamulka degmada dadaalka ay ku bixinayaan u adeegidda bulshada, isaga oo ku dhiirrigeliyay inay sii xoojiyaan hufnaanta, isla xisaabtanka, iyo horumarinta adeegyada aas-aasiga ah.
Hoggaamiyaha ayaa caddeeyay in Dowladda Koonfur Galbeed ay ka go’an tahay horumarinta maamul wanaagga iyo kor u qaadidda adeegyada bulshada ee deegaanada hoos yimaada.
Dhacdadan ayaa muujinaysa dadaalka joogtada ah ee maamulka Koonfur Galbeed ee lagu xoojinayo hufnaanta maamulka iyo tayeynta adeegyada bulshada si loo gaaro horumar waara oo ka turjumaya baahida shacabka deegaanka.
