BAYDHABO, Juun 23 – Hoggaamiyaha Dowladda Koonfur Galbeed, Sheekh Aadan Maxamed Nuur (Madoobe), ayaa Talaadadii magaalada Baydhabo kula kulmay wafdi sare oo ka socday Qaramada Midoobay, iyadoo wada-hadallada ay diiradda saareen xaaladda siyaasadeed, dowlad-dhisidda iyo xasilloonida gobolka.
Wafdiga Qaramada Midoobay waxaa hoggaaminayay Madaxa Arrimaha Siyaasadda ee Qaramada Midoobay u qaabilsan Soomaaliya, Vikram Parekh, iyo Madaxa Arrimaha Siyaasadda ee hay’addaasi u qaabilsan Dowladda Koonfur Galbeed, Morgan Dube.
Sida lagu sheegay bayaan ka soo baxay maamulka Koonfur Galbeed, kulanka oo ka dhacay xarunta madaxtooyada ee Baydhabo waxaa sidoo kale ka qeyb galay Agaasimaha Madaxtooyada iyo masuuliyiin kale, iyadoo laga wada hadlay xoojinta iskaashiga u dhexeeya Qaramada Midoobay iyo maamulka Koonfur Galbeed.
Labada dhinac ayaa sidoo kale ka wada hadlay dardargelinta geeddi-socodka dowlad-dhisidda iyo sidii loo xoojin lahaa xasilloonida guud ee deegaannada maamulka Koonfur Galbeed.
Mas’uuliyiinta Qaramada Midoobay ayaa muujiyay sida ay uga go’an tahay sii wadista taageerada ay siinayaan maamulka, gaar ahaan dhinacyada horumarinta hay’adaha dowladda, dib u heshiisiinta iyo hirgelinta hannaan siyaasadeed oo loo dhan yahay.
Dhankiisa, Hoggaamiye Sheekh Aadan Madoobe ayaa uga mahadceliyay Qaramada Midoobay doorka ay ku leedahay taageerada Soomaaliya, isaga oo carrabka ku adkeeyay muhiimadda ay leedahay sii xoojinta iskaashiga si loo gaaro nabad waarta, xasillooni iyo horumar waara.
