Port Sudan – Maxkamad ku taalla magaalada Port Sudan ayaa xukun dil ah ku ridday hoggaamiyaha Ciidanka Taageerada Degdegga ah (RSF), Mohamed Hamdan Dagalo (Hemedti), iyo 15 eedeysane oo kale iyagoo maqan, kadib markii lagu helay dambiyo la xiriira dilka guddoomiyihii gobolka Galbeedka Darfur iyo xadgudubyo culus oo ka dhacay gobolkaas.
Sida ay baahisay wakaaladda wararka dowladda ee SUNA, maxkamaddu waxay Dagalo iyo eedeysanayaasha kale ku heshay dambiyo ay ka mid yihiin dambiyo dagaal, dambiyo ka dhan ah aadanaha, xasuuq, iyo weerarro lagu qaaday dad rayid ah iyo xarumo adeegyo dadweyne.
Kiiskan ayaa noqday xukunkii ugu horreeyay ee ka dhan ah hoggaanka sare ee RSF tan iyo markii uu qarxay dagaalka u dhexeeya ciidamada Suudaan iyo RSF bishii Abriil 2023. Dadka la xukumay waxaa ka mid ah ku xigeenka RSF ahna walaalka Dagalo, Abdelrahim Hamdan Dagalo, saraakiil kale oo ka tirsan RSF iyo hoggaamiyeyaal qabiil oo ka soo jeeda deegaannada Galbeedka Darfur.
Kiiska ayaa salka ku haya dilkii guddoomiyihii gobolka Galbeedka Darfur, Khamis Abbakar, oo bishii Juun 2023 la dilay saacado uun kadib markii uu si cad ugu eedeeyay RSF iyo maleeshiyaad la safan inay weerarro ku hayaan shacabka rayidka ah. Dilkaasi wuxuu dhacay xilli ciidamada RSF ay la wareegeen magaalada Al Geneina, oo ah caasimadda gobolka Galbeedka Darfur.
Sida ay sheegeen khubaro ka tirsan Qaramada Midoobay, rabshadihii ka dhacay Al Geneina ayaa lagu dilay inta u dhexeysa 10,000 ilaa 15,000 oo qof, kuwaas oo intooda badan ka soo jeeday qowmiyadda Massalit. RSF ayaa marar badan beenisay eedeymaha loo jeediyay ee la xiriira xasuuqa iyo dambiyada kale ee dagaalka.
Maxkamadda ayaa sheegtay in kiiska loo gudbin doono Maxkamadda Sare si dib loogu eego, iyadoo sidoo kale la bilaabi doono dadaallo caalami ah oo lagu soo qabanayo dadka la xukumay, iyadoo la adeegsanayo Interpol iyo hannaano kale oo iskaashi caalami ah. Dagaalka Suudaan ayaa ka dhashay khilaaf u dhexeeyay hoggaamiyaha ciidamada Suudaan, Jeneraal Abdel Fattah Al Burhan, iyo hoggaamiyaha RSF, Mohamed Hamdan Dagalo, kaas oo salka ku hayay qorshaha lagu dhex milayo RSF ciidanka qaranka.
Iskahorimaadka, oo galay sannadkiisii afraad, ayaa sababay dhimashada tobannaan kun oo qof, barakaca in ka badan 11 milyan oo ruux, waxaana Qaramada Midoobay ay ku tilmaantay mid ka mid ah dhibaatooyinka bani’aadannimo, barakaca iyo gaajada ee ugu daran dunida.
