BAYDHABO, Soomaaliya — Ciidanka Xoogga Dalka Soomaaliya ayaa hawlgal qorshaysan ka fuliyey gobolka Baay, kaas oo lagu beegsaday goobo ay Al-Shabaab u adeegsan jireen gabaad iyo isku-abaabul, sida ay sheegeen ciidamada.
Hawlgalka waxaa fuliyey Ururka 161-aad ee Guutada 16-aad ee Kumaandooska Danab, waxaana uu ka dhacay deegaanka Yaaq-Doomaar ee gobolka Baay.
Intii uu hawlgalku socday, waxaa ciidamada isku soo dhiibay mid ka mid ah xubnaha Al-Shabaab, sida ay ciidamada sheegeen.
Ciidamada Kumaandooska Danab ayaa sidoo kale burburiyey goobihii la beegsaday, kuwaas oo lagu sheegay inay kooxda u adeegsan jireen gabaad iyo isku-abaabul.
Sida ay sheegeen ciidamada, ujeeddada hawlgalku waxay ahayd in lagu wiiqo dhaq-dhaqaaqyada Al-Shabaab iyo in la xoojiyo amniga deegaannada gobolka Baay.
Hawlgalka ayaa qeyb ka ah howlgallada ciidamada dowladda Soomaaliya ay ka wadaan deegaanno ka tirsan koonfurta iyo bartamaha dalka, kuwaas oo lagu doonayo in lagu wiiqo awoodda kooxda Al-Shabaab.
Ciidanka Kumaandooska Danab ayaa door muhiim ah ka qaata howlgallada ka dhanka ah Al-Shabaab, gaar ahaan weerarrada lagu beegsado fariisimo iyo goobo ay kooxda ku dhuumaaleysanayso.
Ciidamada ma aysan bixin faahfaahin dheeraad ah oo ku saabsan qofka is dhiibay ama khasaaraha ka dhashay hawlgalka.
Maamulka Soomaaliya ayaa sheegay in howlgallada noocan ah ay qayb ka yihiin dadaallada lagu sugayo amniga iyo dib loogu soo celinayo gacan-ku-haynta dowladda ee deegaannada ay weli ku sugan yihiin Al-Shabaab.
