MUQDISHO (SMN) – Qoraal kasoo baxay wasaaradda shaqada iyo arrimaha bulshada xukuumadda Soomaaliya ayaa waxaa looga hadlay dilkii xalay Muqdisho loogu geystay Allaha u naxariistee Safiyo Abuukar Karaani oo aheyd agaasimihii maamulka iyo maaliyadda wasaaradda.
Ugu horreyn wasaaradda shaqada iyo arrimaha bulshada ayaa tacsi u dirtay ehellada marxuumadda, oo ay uga baryeen inuu ka waraabiyo Jannadiisa Firdowsa.
Safiyo Karaani ayaa kooxo ku hubeysnaa bistoolado waxa ay ku dileen waddada Maka Al-Mukarrama, gaar ahaan agagaarka isgoyska Sayidka ee magaalada Muqdisho.
Halkan hoose ka aqriso:-
Innaa lillahi wa innaa ilayhi raajicuun.
Wasaaradda Shaqada iyo Arrimaha Bulshada Xukuumadda Federaalka Soomaaliya , oo ay ugu horreeyaan Wasiirka , wasiiru Dawlaha , Wasiir ku-xigeenka , Agaasimaha Guud , agaasime waaxeedyada iyo dhammaan howlwadeennada waxay la murugoonayaan geerida Allaha u naxariisto, Agaasimihii maamulka iyo maaliyadda ee Wasaaradda , Safiyo Abuukar Karaani oo caawa Muqdisho ku geeriyootay.
AUN Maamo Safiyo, adeeggii qaranka ee marxadaha kala duwan ee waqtiga dheer ah ay ku soo shaqaysay iyo hoggaaminteeda waxay tusaale u ahaayeen Shaqaalaha Rayidka ee Dawladda.
Waxaan si gaar ah ugu tacsiyeenaynaa dhammaan Carruurta iyo qoyska. Waxaana Eebe uga baryeenaa inuu Jannadiisa ka waraabiyo, samir iyo iimaana naga wada siiyo. Aaamin!
