DHUUSAMAREEB, Soomaaliya — Madaxweynaha Soomaaliya, Xasan Sheekh Maxamuud, ayaa Khamiistii hambalyo u diray hoggaanka cusub ee dowlad-goboleedka Galmudug, isaga oo ugu baaqay inay mudnaanta koowaad siiyaan amniga, dib-u-heshiisiinta iyo horumarinta adeegyada bulshada.
Liibaan Axmed Xasan ayaa loo doortay hoggaamiyaha Galmudug, halka Cabdiweli Ibraahim Garyare loo doortay hoggaamiye ku-xigeenka, kaddib doorasho ay xubnaha Golaha Wakiillada maamulka ku qabteen magaalada Dhuusamareeb.
Madaxtooyada Soomaaliya ayaa bayaan ay soo saartay ku sheegtay in madaxweynuhu uu labada hoggaamiye ugu hambalyeeyay kalsoonida ay ka heleen xildhibaannada, isaga oo ku boorriyay inay wax ka qabtaan caqabadaha amni iyo colaadaha sokeeye ee ka jira deegaannada maamulka.
Xasan Sheekh ayaa hoggaanka cusub kula dardaarmay inay xoojiyaan midnimada bulshada, horumariyaan kaabayaasha dhaqaalaha, isla markaana sare u qaadaan tayada adeegyada bulshada.
Madaxweynaha ayaa doorashada ku tilmaamay mid taariikhi ah, isaga oo sheegay in boqollaal kun oo qof oo ku kala nool magaalooyinka waaweyn iyo deegaannada miyiga ah ee Galmudug ay qayb ka ahaayeen geeddi-socodka doorashada.
Wuxuu sheegay in ka-qaybgalka shacabka uu muujinayo doorka muwaadiniintu ku leeyihiin horumarinta dimuqraadiyeynta iyo dhismaha hay’adaha dowladeed ee Soomaaliya.
Madaxweynaha ayaa sidoo kale Alle uga baryay hoggaamiyaha iyo ku-xigeenkiisa cusub inuu u fududeeyo gudashada waajibaadka culus ee loo igmaday, si ay uga mira-dhaliyaan himilooyinka shacabka Galmudug ee nabadda, dowladnimada iyo horumarka.
Galmudug waa mid ka mid ah dowlad-goboleedyada federaalka Soomaaliya, waxayna ku taallaa bartamaha dalka. Maamulka ayaa wajahaya caqabado ay ka mid yihiin amni-darrada, khilaafaadka deegaanka iyo baahida loo qabo xoojinta hay’adaha dowladeed.
Doorashada hoggaanka cusub ayaa ku soo beegmaysa xilli Soomaaliya ay weli ka jiraan khilaafaad u dhexeeya dowladda federaalka iyo mucaaradka oo ku saabsan habka doorashooyinka iyo jihada siyaasadeed ee dalka.
Hoggaanka cusub ayaa laga sugayaa inuu la shaqeeyo bulshada deegaanka iyo dowladda federaalka si loo xoojiyo amniga, loo xalliyo khilaafaadka, loona dardargeliyo horumarka Galmudug.
