MUQDISHO, Soomaaliya — Booliiska gobolka Banaadir ayaa xiray haweeney lagu tuhmayo inay ninkeeda ku dishay degmada Dayniile ee magaalada Muqdisho, sida ay maanta oo Jimce ah sheegeen saraakiisha amniga.
War kasoo baxay taliska booliiska gobolka Banaadir ayaa lagu sheegay in ciidamada ka howlgala xaafadaha Dayniile ay gacanta ku dhigeen Fadumo Maxamed Cusmaan, oo loo heysto inay si toos ah uga dambeysay dilka ninkeeda.
Marxuumka oo lagu magacaabi jiray Hassan Maxamed Nuur ayaa u dhintay dhaawacyo halis ah oo loo adeegsaday middi, taasoo lagu eedeeyay in ay ku dhufatay xaaskiisu, sida lagu yiri bayaanka booliiska.
Saraakiisha amniga ayaa sheegay in baaritaanno ay socdaan si loo ogaado duruufaha dhabta ah iyo ujeeddada ka dambeysa falka dilka ah.
Booliisku waxay intaas ku dareen in tuhmeysanaha maxkamad la horgeyn doono marka ay soo dhammaadaan baaritaannada hordhaca ah.
Dhacdadan ayaa kusoo beegmeysa iyadoo koror laga soo sheegayay kiisaska dilalka gudaha qoysaska oo dhowaanahan kusoo badanayay qaybo ka mid ah Soomaaliya, iyadoo dhowr eedeysane weli ugu jira xabsiyada dambiyo la xiriira dilal qoys oo dhawaan dhacay.
