ADDIS ABABA – Dowladda Federaalka Itoobiya ayaa ka digtay suurtagalnimada dagaal cusub oo ka qarxa gobolka Tigray, kadib markii ay sheegtay in xubno mayal adag oo ka tirsan Jabhadda Xoreynta Shacabka Tigray (TPLF) ay qorsheynayaan guluf militari oo ka dhan ah dowladda dhexe maalmaha soo socda.
Qoraal ay si wadajir ah u soo saareen Wasiirka Arrimaha Bariga Afrika ee Itoobiya, Getachew Reda, iyo Madaxa Sirdoonka Qaranka, Redwan Hussein, ayaa lagu sheegay in TPLF ay waddo diyaar-garow militari, iyagoo uga digay in dib u soo laabashada colaadda ay keeni karto cawaaqib xumo baahsan oo saameyn karta Itoobiya iyo guud ahaan gobolka Geeska Afrika.
Digniintan ayaa kusoo beegmaysa xilli heshiiskii nabadeed ee Pretoria ee lagu soo afjaray dagaalkii laba sano socday ee Tigray uu wajahayo caqabado cusub. Dagaalkaasi oo u dhexeeyay ciidamada federaalka Itoobiya iyo xoogagga TPLF ayaa sababay dhimashada boqollaal kun oo qof, iyadoo Midowga Afrika uu qiyaasay in ku dhowaad 600,000 oo qof ay ku dhinteen.
Dowladda Itoobiya ayaa sidoo kale ku eedeysay TPLF inay jebisay heshiiskii nabadda kadib markii ay bishii April dib u soo celisay baarlamaankii gobolka Tigray, tallaabadaas oo Addis Ababa ku tilmaantay mid sharci-darro ah. Sidoo kale waxaa jira eedeymo dowladda ka imaanaya oo sheegaya in kooxda ay xiriir la leedahay Eritrea, inkastoo TPLF ay arrintaas beenisay.
Xiisadda sii kordheysa ayaa imanaysa iyadoo gobolka Tigray uusan ka qeybgelin doorashooyinkii guud ee dalka ee la qabtay horaantii bishan June sababo la xiriira amni darro iyo muranno siyaasadeed. Khubarada ayaa ka digaya in haddii aan xal siyaasadeed loo helin khilaafka taagan, gobolka uu mar kale geli karo dagaal horseeda masiibo bani’aadannimo iyo xasillooni darro hor leh.
