MUQDISHO – Madaxweyne Xasan Sheekh Maxamuud, ayaa maanta hambalyo iyo mahadnaq qoto dheer u diray macallimiinta dalka iyo kuwa qurbo-joogta ah, xuska Maalinta Macallinka Soomaaliyeed oo sanad kasta la qabto 21-ka Nofeembar. Maalintan oo astaan u ah qiimeynta doorka macallinka ayaa leh muhiimad gaar ah tan iyo markii si rasmi ah loo aqoonsaday 21-kii Nofeembar 1974-kii.
Madaxweyne Xasan Sheekh ayaa sheegay in Maalinta Macallinka ay tahay maalin lagu maamuuso shaqsiyaadka hagaya jiilka maanta iyo kan berriba, kuwaas oo door muuqda ku leh dib-u-dhiska bulshada iyo horumarinta qaranka. Maanta dugsiyada iyo xarumaha waxbarashada ee dalka oo dhan ayaa xidhnaa, si bulshada Soomaaliyeed ay ugu dul-joogsato muhiimadda ay macallimiintu u leeyihiin nolosha qaranka.
Khudbaddiisa, Madaxweynaha ayaa xusay muuqaalka gaarka ah ee uu u leeyahay xuskan, maadaama uu ka soo shaqeeyay waxbarashada ka hor inta uusan madaxweyne noqon. Dr. Xasan Sheekh waxa uu ka mid ahaa macallimiintii u taagnaa ilaalinta iftiinka aqoonta xilligii colaadaha, isaga oo door hoggaamineed ka qaatay dib-u-dhiska goobaha waxbarashada iyo diyaarinta manhajyo cusub, xilli ay adkaayeen adeegyada dowladeed.
Madaxweynuhu wuxuu carrabka ku adkeeyay in soo kabashada iyo dhismaha dowladnimada Soomaaliyeed ay si toos ah ugu xiran tahay tayada waxbarashada iyo shaqada macallimiinta. Waxa uu ammaanay macallimiinta ka shaqeeya magaalooyinka iyo tuulooyinka fog-fog, kuwaas oo marar badan ku shaqeeya agab kooban, isagoo ku tilmaamay in ay yihiin “naqshadeeyayaasha dhabta ah ee dib-u-soo-kabashada Soomaaliya.”
Xuska Maalinta Macallinka Soomaaliyeed, ayuu ku tilmaamay mid aan ahayn munaasabad keliya oo la xuso, balse ah ballan-qaad qaran oo ku wajahan dhiirrigelinta aqoonta iyo barashada, kuwaas oo uu ku sheegay in ay yihiin aaladaha ugu waaweyn ee horumarka bulshada lagu gaaro.
