New York – Qaramada Midoobay ayaa dood ka yeelatay xayiraadda dhaqaale ee Mareykanka uu saaray Cuba, iyadoo dalal badan ay cambaareeyeen saameynta ay xayiraaddu ku leedahay shacabka Cuba.
Wasiirka Arrimaha Dibadda Cuba, Bruno Rodríguez, oo ka hadlay Golaha Guud ee Qaramada Midoobay, ayaa ku eedeeyay Mareykanka inuu muddo ku dhow toddobaatan sano waday siyaasad cadaadis ah oo uu ku tilmaamay mid “aan naxariis lahayn”, isaga oo sheegay in xayiraaddu ay tahay ciqaab wadajir ah oo saameyneysa shacabka Cuba. Rodríguez ayaa sheegay in khasaaraha dhaqaale ee ka dhashay xayiraadda intii u dhaxaysay Maarso 2025 ilaa Febraayo 2026 uu gaaray ku dhowaad 8 bilyan oo doollar, taas oo uu sheegay inay ka tarjumeyso saameynta baaxadda leh ee siyaasadda Mareykanka ku yeelatay dhaqaalaha dalka.
Dalal badan oo ka tirsan Afrika, Kariibiyaanka iyo gobollo kale ayaa taageeray Cuba, iyagoo ku baaqay in dib loo eego xayiraadda Mareykanka. Golaha Guud ee Qaramada Midoobay ayaa tan iyo 1992-kii si joogto ah u ansixinayay qaraarro aan qasab ahayn oo ku baaqaya in la qaado xayiraadda saaran Cuba.
Dhanka kale, Safiirka Mareykanka ee Qaramada Midoobay, Mike Waltz, ayaa sheegay in aysan jirin xayiraad Mareykan ah oo ka dhan ah Cuba, isaga oo ku eedeeyay dowladda Cuba inay mas’uul ka tahay dhibaatooyinka shacabka haysta.
Midowga Yurub ayaa sidoo kale ka hadlay arrinta, iyadoo Safiirka Midowga Yurub ee Qaramada Midoobay, Stavros Lambrinidis, uu sheegay in dhibaatooyinka Cuba aysan kaliya ka dhalan xayiraadda Mareykanka, balse ay jiraan arrimo gudaha ah oo u baahan dib-u-habeyn siyaasadeed iyo dhaqaale.
Doodda Qaramada Midoobay ayaa kusoo beegmeysa xilli Cuba ay wajahaysay dhibaatooyin la xiriira koronto la’aan, yaraanta shidaalka, cuntada, biyaha iyo dawooyinka, taas oo hay’adaha Qaramada Midoobay ay ka digeen inay sababi karto xaalad bani’aadamnimo oo sii xumaata.
