Rabat – Soomaaliya iyo Kenya ayaa xoojiyay iskaashigooda dhinaca amniga badda, kaddib kulan ay yeesheen mas’uuliyiinta labada dal intii lagu guda jiray Shirweynaha Ciidamada Badda Afrika (AMFS 2026) oo lagu soo gabagabeeyay magaalada Rabat ee Boqortooyada Morocco.
Shirka oo ay ka qeybgaleen madaxda hay’adaha amniga badda ee dalal badan oo Afrikaan ah ayaa diiradda lagu saaray xoojinta iskaashiga gobolka, la dagaallanka dambiyada ka dhaca badda, horumarinta awoodda ciidamada ilaalada xeebaha iyo sare u qaadidda wadaagga xogta la xiriirta amniga badda.
Agaasimaha Guud ee Adeegga Ilaalada Xeebaha Kenya (KCGS), Bruno I. Shioso, ayaa intii uu shirku socday kulamo laba geesood ah la yeeshay mas’uuliyiin ka kala socday Soomaaliya, Uganda, Jabuuti, Itoobiya, Mauritius iyo dalal kale oo iskaashi la leh Kenya.
Kulamadaas ayaa lagu falanqeeyay sidii loo xoojin lahaa iskaashiga dhinacyada amniga badda, dhisidda awoodda hay’adaha ilaalada xeebaha, is-weydaarsiga macluumaadka sirdoonka iyo isku dubbaridka jawaabaha laga bixiyo khataraha sii kordhaya ee ka jira badaha gobolka.
Iskaashiga Soomaaliya iyo Kenya ayaa la filayaa inuu door muhiim ah ka qaato la dagaallanka burcad-badeedda, kalluumeysiga sharci darrada ah, tahriibinta dadka iyo badeecadaha, iyo dambiyada kale ee ka dhaca biyaha Geeska Afrika. Adeegga Ilaalada Xeebaha Kenya ayaa sheegay inuu sii wadi doono la shaqeynta dalalka gobolka iyo saaxiibbada caalamiga ah si loo xaqiijiyo bad ammaan ah oo taageerta kobaca dhaqaalaha buluugga ah iyo xasilloonida amniga badda ee Afrika.
