MUQDISHO — Soomaaliya iyo Uganda ayaa kala saxiixday heshiis laba-geesood ah oo lagu xoojinayo iskaashiga dhinacyada shaqada iyo shaqaaleysiinta, iyadoo ujeeddadu tahay ilaalinta xuquuqda shaqaalaha iyo nidaaminta habraacyada shaqaaleysiinta ee labada dal.
Heshiiska waxaa kala saxiixday Wasiirka Shaqada iyo Arrimaha Bulshada ee Dowladda Federaalka Soomaaliya, Prof. Salim Alio Ibro, iyo Wasiirka Jinsiga, Shaqada iyo Horumarinta Bulshada ee Uganda, Lt. Gen. Henry Tumukunde, sida lagu sheegay warbixin ka soo baxday wasaaradda Soomaaliya.
Heshiiska ayaa dhigaya in la sameeyo hannaan cad oo lagu nidaaminayo shaqaaleysiinta muwaadiniinta labada dal, laguna xaqiijinayo in habraacyada shaqaaleysiintu noqdaan kuwo hufan oo caddaalad ah.
Sidoo kale, waxaa heshiiska lagu xoojinayaa badqabka iyo daryeelka shaqaalaha Soomaaliyeed iyo kuwa Uganda, iyadoo la qeexayo waajibaadka loo-shaqeeyayaasha iyo habraacyada lagu maamulayo qandaraasyada shaqada.
Qodobada heshiiska waxaa sidoo kale ka mid ah ilaalinta shaqaalaha si looga hortago tacaddiyada, ku-takrifalka iyo ka faa’iidaysiga sharci-darrada ah, iyo xoojinta wada-shaqaynta hay’adaha shaqada ee labada dal.
Labada dowladood ayaa sidoo kale ku heshiiyay hannaan wada-shaqayn iyo dabagal ah oo lagu qiimeynayo hirgelinta heshiiska, laguna xallinayo khilaafaadka shaqada, iyadoo la raacayo shuruucda iyo xeerarka u yaalla labada dal.
Heshiiskan ayaa qayb ka ah dadaallada Dowladda Federaalka Soomaaliya ee lagu horumarinayo maamulka suuqa shaqada, lagu xoojinayo ilaalinta xuquuqda shaqaalaha, laguna ballaarinayo fursadaha shaqo-abuurka.
Wuxuu sidoo kale saldhig u noqon karaa iskaashi dheeraad ah oo labada dal ka yeeshaan nidaaminta shaqaaleysiinta iyo horumarinta habraacyada lagu ilaalinayo shaqaalaha ka shaqeeya dalalka kale.
Wasaaradda Soomaaliya ma aysan faahfaahin waqtiga uu heshiisku dhaqan-galayo ama jadwalka lagu fulinayo qodobadiisa.
