MUQDISHO — Guddiga Doorashooyinka Qaranka ee Soomaaliya ayaa sheegay in ku dhowaad 5,000 oo shaqaale doorasho ah loo diri doono goobaha codbixinta 25-ka Diseembar, si loo xaqiijiyo in doorashada Qof iyo Cod ee ka dhici doonta gobolka Banaadir ay si habsami leh u dhacdo.
Guddoomiyaha Guddiga Doorashooyinka, Cabdikariin Axmed Xasan, ayaa sheegay in shaqaalahan oo intooda badan ay yihiin dhalinyaro ay soo mareen tababaro la xiriira maamulka doorashooyinka, waajibaadka shaqaalaha, xuquuqda codbixiyeyaasha iyo habraacyada doorashada, si loo hubiyo in geeddi-socodku u dhaco si hufan oo caddaalad ah, isla markaana waafaqsan shuruucda qaranka.
“Doorashada Banaadir waxay leedahay muhiimad gaar ah, waxayna door weyn ka ciyaari kartaa jihada dimuqraadiyadeed ee Soomaaliya,” ayuu yiri Cabdikariin, isaga oo xusay in shaqaalaha doorashadu ay yihiin laf-dhabarta lagu dhiso kalsoonida shacabka ee hannaanka codbixinta.
Guddoomiyuhu wuxuu ku boorriyey shaqaalaha inay ilaaliyaan dhexdhexaadnimo, caddaalad iyo anshax xirfadeed, isla markaana ay si siman ula dhaqmaan dhammaan axsaabta siyaasadda iyo kormeerayaasha doorashada.
Wuxuu intaas ku daray in mas’uuliyadda ay qaadi doonaan maalinta codbixintu ay si toos ah u saameyn doonto aragtida dadweynaha ee ku aaddan doorashooyinka mustaqbalka.
Villa Soomaaliya ayaa ku adkeysanaysa hirgelinta doorashooyinka Qof iyo Cod oo ah mid si toos ah shacabka uga qayb qaadanayaan, halka mucaaradku ay dhankooda ku doodayaan in hannaankaasi uusan ahayn mid caddaalad ah ama suurtagal ah marka la eego duruufaha amni iyo siyaasadeed ee dalka ka jira.
Soomaaliya ayaa dadaal ugu jirta inay ka gudubto nidaamkii doorashooyinka dadban ee ku saleysnaa beelaha, iyadoo hiigsanaysa inay hirgeliso codbixin guud kaddib tobannaan sano oo colaado iyo xasillooni darro ah.
