Leipzig – Dowladda Soomaaliya ayaa markii ugu horreysay ka qeybgashay Shirweynaha Sanadlaha ah ee Madasha Caalamiga ah ee Arrimaha Gaadiidka, International Transport Forum (ITF), oo lagu qabtay magaalada Leipzig intii u dhaxeysay 6–8 May.
Soomaaliya waxaa shirkan ku matalayay Agaasimaha Guud ee Wasaaradda Gaadiidka iyo Duulista Hawada, Cumar Afrax, kaas oo ka qeyb galay doodaha iyo kulamada looga hadlayay horumarinta gaadiidka cirka, dhulka iyo badda.
Madasha ITF waa gole caalami ah oo ay ku mideysan yihiin ku dhawaad 100 dowladood, hay’ado iyo shirkado caalami ah, waxaana looga hadlaa arrimaha isku socodka, isku xirnaanta iyo maalgelinta kaabeyaasha gaadiidka.
Intii uu shirku socday, Agaasimaha Guud ayaa kulamo la yeeshay masuuliyiin ka socotay Turkiga, Azerbaijan, Shiinaha iyo madaxda ITF, iyadoo laga wada hadlay iskaashiga dhinaca gaadiidka iyo fursadaha maalgashi ee Soomaaliya.
Madasha ayaa si weyn u soo dhaweysay ka qeybgalka Soomaaliya, waxayna ku casuuntay inay sanadka dambe noqoto xubin buuxda oo ITF ah, arrintaas oo muujinaysa kalsoonida sii kordheysa ee beesha caalamka ay ku qabto Soomaaliya iyo horumarka ay sameyneyso.
