ISTANBUL, Turkiga – Wasiirka Wasaaradda Beeraha iyo Waraabka Xukuumadda Federaalka Soomaaliya, Maxamed Cabdi Xayir Maareeye, ayaa magaalada Istanbul kaga qeyb galay Madasha Wasiirrada Beeraha Adduunka ee sanadkan, oo looga hadlayay sidii looga hortagi lahaa luminta cuntada iyo biyaha, lana ilaalin lahaa mustaqbalka dabiiciga ah ee dunida.
Madashan oo ka dhacday Istanbul, ayaa wasiirradu ku falanqeeyeen caqabadaha sii kordhaya ee saameynaya amniga cuntada iyo helitaanka biyaha, iyadoo sanadkan diiradda la saaray in dalalka caalamku qaadaan tallaabo degdeg ah oo mideysan.
Wasiir Maareeye oo halkaasi ka jeediyay khudbad uu ku dheeraaday xaaladda Soomaaliya, ayaa sheegay in dalka uu wajahayay saameyn joogto ah oo ka dhalatay isbeddelka cimilada—oo ay ku jiraan abaaro soo noqnoqda, yaraanta biyaha, iyo hoos u dhaca wax-soosaarka beeraha. Wuxuu xusay in arrimahan ay khatar ku yihiin dadaallada lagu doonayo in lagu gaaro isku filnaansho cunto iyo koboc dhaqaale oo waara.
Sidoo kale, Wasiirka ayaa ku adkeeyay muhiimadda ay leedahay in la yareeyo khasaaraha cuntada iyo biyaha, isaga oo ku tilmaamay waajib deegaan, dhaqaale iyo bini’aadamnimo. Wuxuu hoosta ka xarriiqay in Soomaaliya ay si buuxda uga go’an tahay hirgelinta Qaraarka Golaha Guud ee Qaramada Midoobay A/RES/74/209, oo dalalka caalamka ku boorinaya inay kordhiyaan dadaallada lagu dhimi karo khasaaraha cuntada iyo biyaha, si loo gaaro horumar waara oo ka faa’iideysta jiilasha maanta iyo kuwa soo socda.
Wada-shaqeyn dheeri ah, maalgelin la xoojiyay, iyo iskaashi caalami ah ayuu wasiirku ku baaqay, si dalalka danyarta ah—oo ay Soomaaliya ku jirto—ay u helaan taageero ay kaga hortagaan khataraha sii kordhaya ee la xiriira cunto yari iyo biyo la’aan.
