LAASCAANOOD (SMN) – Wararka naga soo gaaraya gobolka Sool ayaa sheegaya in saacadihii la soo dhaafay ciidanka SSC-Khaatumo ay la wareegeen gacan ku heynta deegaanka Yagoori oo hoostaga magaalada Laascaanood ee xarunta gobolkaasi.
Deegaankan oo qiyaastii 50 KM galbeed ka xiga Laascaanood ayaa waxaa horay ugu sugnaa ciidamada milatariga Somaliland, balse waxaa haatan gudaha u galay ciidanka deegaanka.
Xaaladda ayaa haatan ah mid aad u kacsan, waxaana dhaq-dhaqaaqyo iska soo horjeedo haatan laga dareemayaa aaggaas oo ay isku horfadhiyaan labada dhinac.
Xoogaga deegaanka ayaa muddooyinkii dambe isku ballaarinayay jihada galbeed ee Laascaanood, waxaana sidoo kale ay jareen jidadkii ay isticmaali jireen ciidamada Somaliland ee ku sugan xerada Goojacadde.
Ma jiro illaa iyo hadda waxa hadal ah oo kasoo baxay saraakiisha labada dhinac ee ku aadan xiisadda haatan ka taagan halkaasi.
Dagaaalka Laascaanood ayaa qaatay dhowr bilood oo xiriir ah, mana muuqdaan weli isku dhowaasho ay sameynayaa labada dhinac oo ku aadan xallinta xiisadaasi.
