AFGOOYE (SMN) – Faahfaahino dheeraad ah ayaa kasoo baxaya dagaal beeleed khasaare kala duwan geystay oo saacadihii lasoo dhaafay ka dhacay deegaanka Yaaqbari-weyne ee gobolka Shabeelaha Hoose.
Dagaalka oo ahaa mid xoogan ayaa waxaa lagu soo warramayaa inuu dhex maray laba maleeshiyo beeleed oo isku haysta dhul daaqsimeed ku yaalla halkaasi.
Wararka ayaa sheegaya in dagaalkan ay ku dhinteen in ka badan 10 qof, halka ay ku dhaawacmeen tiro kale oo intaasi ka badan, sida ay innoo sheegeen dadka deegaanka.
Dagaalka ayaa lagu soo warramayaa inuu haatan istaagay, balse waxaa weli dhaq dhaqaaqyo iska soo horjeedo wado maleeshiyaadka labada dhinac.
Ma jirto illaa iyo hadda cid soo kala dhex gashay labada maleeshiyo beeleed ee weli ku dagaalamaya duleedka deegaanka Yaaqbari-weyne, taas oo wal wal ku heyso dadka deegaanka, maadaama uu mar kasta dib u qarxi karo dagaalka u dhexeeyo beelahaasi..
Si kastaba, deegaanadan ayaa waxaa marar badan kusoo laa laabtay dagaal beeleedyada, kuwaas oo saameyn xoogan ku yeeshay dadka shacabka ah ee ku dhaqan halkaasi, mana muuqdaan qorshayaal cad oo ay wax uga qabaneyso Koonfur Galbeed Soomaaliya.
