MUQDISHO – Burcad-badeed ayaa mar kale ka soo muuqday xeebaha Soomaaliya, iyadoo dhowr weerar oo lagu qaaday maraakiib ganacsi laga soo sheegay toddobaadyadii u dambeeyay. Weerarradan ayaa ka dhacay meel u dhow xeebaha Puntland iyo badda Hindiya ee dhinaca Soomaaliya.
Saraakiil ka tirsan howlgalka badda ee Midowga Yurub (EU NAVFOR Operation Atalanta) ayaa sheegay in xaaladda ay hadda tahay mid walaac leh, maadaama ay sii kordhayaan isku dayada afduubka maraakiibta iyo weerarrada hubeysan.
Ciidamada badaha caalamka ayaa kordhiyay joogitaankooda aagga si ay u ilaaliyaan maraakiibta maraysa marin-biyoodka muhiimka ah ee gacanka Cad iyo badda Hindiya.
Midowga Yurub ayaa sheegay in dib-u soo laabashada burcad-badeedda ay khatar ku tahay ganacsiga caalamiga ah iyo xasiloonida gobolka, isagoo ku baaqay in la adkeeyo iskaashiga amniga badda iyo taageerada dowladda Soomaaliya.
Dadka deegaanka, gaar ahaan kalluumaysatada Puntland, ayaa sheegay in weerarradan cusub ay cabsi geliyeen bulshada, isla markaana ay saameyn ku yeelan karaan nolol maalmeedkooda.
“Haddii burcad-badeeddu soo laabato, kalluumaysigu wuu istaagayaa, dadka badana way shaqo la’aan noqonayaan,” ayuu yiri mid ka mid ah kalluumaysatada degmada Eyl.
Weerarrada noocan ah ayaa dib u soo bilaabmay markii muddo dhowr sano ah ay burcad-badeedda Soomaaliya si weyn hoos ugu dhacday, kaddib dadaallo caalami ah oo lagu xakameeyay.
Si kastaba ha ahaatee, khubarada amniga badda ayaa sheegaya in sababo ay ka mid yihiin daciifnimada ilaalinta xeebaha, xaaladda gudaha ee Soomaaliya, iyo iska horimaadyada ka jira badda Cas ay keeneen in kooxihii burcad-badeedda ahi ay mar kale soo baxaan.
