JAMAAME – Ciidamada Xoogga Dalka Soomaaliyeed ee Qeybta 43-aad iyo Kumaandooska Danab ayaa howlgallo qorsheysan oo ka dhan ah kooxda Al-Shabaab ka sameeyay dhowr tuulo oo ku dhow degmada Jamaame ee gobolka Jubbada Hoose, sida ay sheegeen saraakiil ka tirsan milatariga.
Howlgallada oo socday muddo saacado ah ayaa laga fuliyay Muuse Xaaji, Araare, Koban, Bangeeni, Maleyleey, Baladu-raxma iyo Maam-bile. Deegaannadan ayaa la sheegay inay muddooyinkii dambe ahaayeen meelo ay kooxda Al-Shabaab ka sameysteen gabaad iyo marinno ay ku dhaqaaqaan.
Warbixin ay ciidamada soo saareen ayaa lagu sheegay in intii uu howlgalka socday:
- Laga burburiyay goobihii Al-Shabaab ku lahayd xarumaha kaydka iyo isku-dubaridka.
- Laga helay agab militari oo ay kooxda isticmaali jirtay, oo ay ku jiraan qalab isgaarsiineed iyo sahay ciidan.
- Laga saaray xubno ka tirsan kooxda meelo ay ku dhuumaalaysteen, inkastoo aan la shaacin tirada rasmiga ah ee khasaaraha.
Ciidamada ayaa sidoo kale sheegay in ay qabteen dhowr godad dhulka hoostiisa ah oo Al-Shabaab ay u adeegsan jirtay isu-gudbinta gudaha tuulooyinka ku yaalla aaggaas.
Intii howlgalka socday, diyaarado dagaal oo ka tirsan Dowladda Federaalka ayaa fuliyay duqeymo lala beegsaday goobo ay ciidamada dhulka heleen tilmaamahooda. Duqeymahaas ayaa lagu burburiyay meelo Al-Shabaab ay ka samaysatay xarumo kooban oo kayd iyo kulanno u ahaa.
Saraakiisha howlgalka hoggaaminaysay waxay sheegeen in duqeymuhu ay ahaayeen kuwo qayb muhiim ah ka qaatay furfurista difaacyadii kooxda iyo burburinta agabkii ay ku dhaqaaqi jirtay.
Ciidamada Xoogga Dalka ayaa sheegay inay weli hawlgallada ka wadaan agagaarka Jamaame, iyagoo baaritaanno ka sameynaya tuulooyinka laga saaray Al-Shabaab si looga hortago in xubno ka tirsan kooxda ay dib ugu soo laabtaan.
Saraakiisha ayaa intaas ku daray in hawlgallada ay yihiin kuwo qayb ka ah dadaallada lagu doonayo in lagu sugo nabadgelyada deegaannada ku yaalla Jubbada Hoose, ayna socon doonaan illaa laga xaqiijiyo amniga guud.
