Muqdisho — Mas’uuliyiin ka tirsan Qaramada Midoobay ayaa ka digay in ku dhowaad 6.5 milyan oo qof, oo u dhiganta saddex-meelood meel shacabka Soomaaliya, ay wajihi doonaan heerar gaajo oo halis ah ilaa bisha Maarso, taasoo ka dhigan koror dhan 1.7 milyan tan iyo bishii Janaayo.
Isagoo warbaahinta kula hadlayay xarunta Qaramada Midoobay isagoo adeegsanaya muuqaal toos ah, Agaasimaha Diyaargarowga iyo Ka-jawaabista Degdegga ah ee World Food Programme (WFP), Ross Smith, ayaa sheegay in warbixintii ugu dambeysay ee (IPC) ee Soomaaliya ay xaqiijisay in xaaladda bani’aadannimo ay si weyn uga sii dartay.
Smith ayaa xusay in laba milyan oo ka mid ah dadka ugu nugul — haween iyo carruur — la filayo inay wajahaan gaajo daran, halka in ka badan 1.8 milyan oo carruur ah oo da’doodu ka yar tahay shan sano ay halis ugu jiraan nafaqo-darro ba’an sannadka 2026.
Smith wuxuu sheegay in Soomaaliya ay ku jirto qalalaase gaajo oo aad u adag, kaddib markii labo xilli-roobaad ay fashilmeen, iyadoo ay sii jiraan colaado iyo amni-darro, taasoo kumannaan qof ku qasabtay inay ka barakacaan guryahooda si ay u helaan cunto, hoy iyo adeegyo aasaasi ah.
Dhanka kale, hay’adaha ka shaqeeya Soomaaliya, oo ay ku jirto WFP, ayaa wajahaya dhaqaale yari ba’an. Smith ayaa ka digay in haddii aan si degdeg ah loo helin maalgelin, gargaarka degdegga ah ee cunto iyo nafaqo ee WFP uu istaagi karo, taasoo si gaar ah u saameyn doonta dadka ugu nugul.
Rein Paulsen, Agaasimaha Xafiiska Gurmadka Degdegga ah iyo Adkeysiga ee (FAO), ayaa iftiimiyay saameynta ba’an ee abaartu ku yeelatay wax-soo-saarka beeraha Soomaaliya.
Wuxuu sheegay in abaartu sababtay hoos u dhac ballaaran oo ku yimid dalagyada iyo xoolaha, isla markaana ay keentay barakac baahsan. Sida uu sheegay, goosashadii ugu dambeysay ee dalagyada badarka ayaa hoos uga dhacday celceliskii muddada dheer (1995–2025) boqolkiiba 83, halka dhalashada xooluhuna ay si weyn u yaraatay.
Paulsen ayaa carrabka ku adkeeyay baahida degdegga ah ee loo qabo gargaar naf-badbaadin ah si loo ilaaliyo nolosha dadka iyo in laga hortago burbur ku yimaada nolol-maalmeedka beeraleyda iyo xoolo-dhaqatada.
Si wax looga qabto xaaladda, FAO waxay u baahan tahay $85 milyan si loo taageero hal milyan oo ka mid ah dadka reer miyiga ah ee ugu nugul, hase yeeshee ilaa hadda waxa la helay kaliya $6 milyan.
Mas’uuliyiinta Qaramada Midoobay ayaa ugu baaqay beesha caalamka inay si degdeg ah u kordhiyaan taageerada si looga hortago masiibo bani’aadannimo oo ka sii daran.
