Harare, Zimbabwe – Senetarada Zimbabwe ayaa ansixiyay wax ka beddel lagu sameynayo dastuurka dalka, kaas oo dib u dhigaya doorashada madaxtinimada, isla markaana kordhinaya muddada xilka Madaxweyne Emmerson Mnangagwa.
Sharcigan ayaa hadda sugaya saxiixa madaxweynaha si uu si rasmi ah u noqdo mid sharci ah. Sida lagu sheegay natiijada codbixinta, 75 senatar ayaa taageeray hindisaha, halka afar ay diideen. Qaar ka mid ah xildhibaannada mucaaradka ayaa sidoo kale ku biiray xisbiga talada haya si ay u taageeraan isbeddelka.
Wax ka beddelka cusub ayaa dhigaya in doorashada madaxtinimada ee la filayay 2028 loo wareejiyo 2030, taas oo si toos ah u kordhinaysa muddada xilka Madaxweyne Mnangagwa oo hadda lagu daray laba sano oo dheeraad ah.
Sidoo kale, hindisaha ayaa wax ka beddelaya nidaamka doorashada madaxweynaha, iyadoo laga guurayo doorasho toos ah oo dadweyne una wareegaysa hannaan xildhibaanadu ay dooranayaan. Waxaa sidoo kale la kordhiyay muddada xilka madaxweynaha iyo baarlamaanka, taasoo laga dhigay 7 sano halkii ay ka ahayd 5 sano.
Qaar ka mid ah mucaaradka iyo dhaleeceeyayaasha ayaa sheegay in tallaabadan ay ahayd inay maraan afti dadweyne, halkii lagu ansixin lahaa oo keliya baarlamaanka.
Dhinaca kale, taageerayaasha madaxweynaha ayaa ku doodaya in baarlamaanku awood u leeyahay inuu sameeyo isbeddelladan, maadaama xadka muddada xilka uu weli jiro inkastoo la kordhiyay waqtiga.
Madaxweyne Emmerson Mnangagwa, oo 83 sano jir ah, ayaa xilka hayay tan iyo 2017, kadib markii milatarigu taageeray in xilka laga tuuro madaxweynihii hore Robert Mugabe, oo geeriyooday 2019.
Aqalka hoose ee baarlamaanka Zimbabwe ayaa isna horay si aqlabiyad leh ugu ansixiyay hindisahan todobaadkii hore, taasoo ka dhigeysa mid u dhow inuu noqdo sharci rasmi ah.
