Taiz, Yemen – Kooxda Xuutiyiinta ayaa madaafiic ku garaacday xarunta garsoorka ee magaalada Taiz ee koonfur-galbeed Yemen, iyadoo aan la soo sheegin wax khasaare nafeed ama dhaawac ah, sida ay baahisay wakaaladda wararka dowladda Yemen ee SABA.
Wararka ayaa sheegaya in dhowr madfac ay ku dhaceen xarunta garsoorka ee ku taalla xaafadda Jabal Jurrah ee bartamaha magaalada Taiz. Ilo maxalli ah ayaa sheegay in madaafiicda laga soo riday fariisimaha ay Xuutiyiintu ku leeyihiin waqooyiga magaalada.
SABA ayaa weerarka ku tilmaantay mid qeyb ka ah duqeymaha joogtada ah ee Xuutiyiintu ku bartilmaameedsadaan xaafadaha la deggan yahay iyo xarumaha rayidka ee magaalada Taiz. Dhanka kale, Xuutiyiintu weli kama aysan hadlin eedeymahaasi. Weerarkan ayaa kusoo beegmaya xilli ay sare u kacayaan xiisadaha militari ee u dhexeeya dowladda caalamku aqoonsan yahay ee Yemen iyo kooxda Xuutiyiinta.
Sultan Al-Aradah, oo ka tirsan Golaha Hoggaanka Madaxweynaha Yemen, ayaa sheegay in Xuutiyiintu “aysan rumeysneyn wax aan dagaal ahayn,” isagoo ku baaqay in tallaabo adag laga qaado kooxda. Saacadihii la soo dhaafay waxaa sidoo kale la arkayay dhaqdhaqaaqyo militari oo xooggan, iyadoo duqeymo cirka ah lagu beegsaday fariisimaha Xuutiyiinta ee gobollada Hodeidah, Marib iyo Al-Jawf.
Dhankooda, Xuutiyiintu waxay sheegeen inay weerarro ku qaadeen xarumo ay leedahay shirkadda Aramco ee ku yaalla magaalooyinka Jazan iyo Yanbu ee Boqortooyada Sacuudi Carabiya, iyagoo sheegay inay adeegsadeen gantaallo ballistic ah iyo diyaarado aan duuliye lahayn. Khubaro amni ayaa ka digaya in kororka iska horimaadyada Yemen uu sii kordhin karo khatarta amni ee Badda Cas iyo Gacanka Cadmeed, oo ah marin-biyood ay maraan boqolkiiba weyn oo ganacsiga caalamiga ah. Weerarro hor leh oo ka dhaca gobolka ayaa sare u qaadi kara kharashaadka maraakiibta, qiimaha caymiska iyo dib-u-dhacyada ku yimaada isu-socodka ganacsiga.
Xaaladdan ayaa sidoo kale saameyn ku yeelan karta dalalka Geeska Afrika, gaar ahaan Soomaaliya iyo Jabuuti, maadaama ay ku yaallaan marin-biyoodka muhiimka ah ee isku xira Badweynta Hindiya iyo Kanaalka Suweys. Khalkhal kasta oo ka dhaca marinkan wuxuu saameyn ku yeelan karaa ganacsiga, amniga xeebaha iyo dadaallada lagu xakameynayo burcad-badeednimada.
Yemen waxaa ka socday dagaal tan iyo sannadkii 2014, markii Xuutiyiintu la wareegeen magaalada Sanca iyo deegaanno kale oo muhiim ah. Sannadkii xigay waxaa faragelin militari sameeyay isbahaysi Carbeed oo uu hoggaaminayo Sacuudi Carabiya si uu u taageero dowladda caalamku aqoonsan yahay. Inkasta oo xabbad-joojintii la gaaray bishii Abriil 2022 ay hoos u dhigtay dagaalladii tooska ahaa, haddana toddobaadyadii u dambeeyay waxaa mar kale sii kordhay dhaq-dhaqaaqyada militari iyo weerarrada is-dhaafsiga ah, iyadoo dadaalladii lagu gaari lahaa xal siyaasadeed ay weli hakad ku jiraan.
