Ouagadougou – Dalalka Burkina Faso, Mali iyo Niger ayaa wada dadaallo lagu mideynayo siyaasadaha ku saabsan macdanta, tamarta iyo shidaalka, iyadoo saddexda waddan ee ku bahoobay Isbahaysiga Dowladaha Sahel (AES) ay doonayaan inay yeeshaan hannaan mideysan oo lagu maareeyo khayraadkooda dabiiciga ah ee istiraatiijiga ah.
Arrintan ayaa looga hadlay kulan ka dhacay magaalada Ouagadougou, kaas oo ay ka qeyb galeen mas’uuliyiin sare iyo khubaro farsamo oo ka kala socday saddexda dal. Wadahadallada oo socday ilaa 12-ka Agoosto ayaa diiradda lagu saaray sameynta qaab-dhismeed mideysan oo lagu maamulayo ka faa’iidaysiga khayraadka, is-waafajinta siyaasadaha macdanta iyo tamarta, iyo sameynta Toddobaadka Tamarta iyo Macdanta ee AES.
Hindisahan ayaa looga gol leeyahay in la yareeyo kala duwanaanshaha siyaasadaha saddexda dal, isla markaana la xoojiyo mowqifkooda wadajirka ah ee ku aaddan maalgashiga iyo gorgortanka khayraadka sida dahabka, uranium-ka iyo macdanaha kale ee istiraatiijiga ah.
Mas’uuliyiinta ayaa sidoo kale baaray shan dukumeenti oo muhiim ah, kuwaas oo ay ka mid yihiin qaab-dhismeed guud oo lagu maamulayo ka faa’iidaysiga khayraadka tamarta iyo macdanta ee AES, iyo hannaan lagu mideynayo siyaasadaha tamarta iyo macdanta.
Burkina Faso ayaa ku baaqday in la kordhiyo habaynta gudaha ee khayraadka ceeriin, la adkeeyo shuruudaha ka-qaybgalka maxalliga ah, lana horumariyo khibradda gudaha ee gobolka, si dalalku uga helaan faa’iido badan khayraadkooda dabiiciga ah.
Doodaha ayaa sidoo kale taabtay arrimaha macdan-qodista sharci-darrada ah, khiyaanada, musuqmaasuqa, ka ganacsiga macdanta iyo ilaalinta deegaanka, iyadoo xoogga la saaray ilaalinta bulshada iyo shaqaalaha ka howlgala goobaha macdanta.
Tallaabadan ayaa qeyb ka ah qorshaha ballaaran ee is-dhexgalka dhaqaale iyo siyaasadeed ee AES, oo ay Burkina Faso, Mali iyo Niger aasaaseen sanadkii 2024, si ay u xoojiyaan iskaashigooda dhinacyada siyaasadda, dhaqaalaha iyo amniga.
Saddexda dal ayaa hadda doonaya inay sameystaan xeerar iyo siyaasado mideysan oo ku saabsan khayraadka istiraatiijiga ah, si ay u xoojiyaan silsiladaha qiimaha gudaha, u kordhiyaan faa’iidada ay ka helayaan khayraadkooda, isla markaana ay yeeshaan mowqif wadajir ah oo xooggan marka laga hadlayo maalgashiga iyo horumarinta macdanta iyo tamarta gobolka Sahel.
