MUQDISHO – Wasaaradda Gaashaandhigga Soomaaliya ayaa sheegtay in Ciidamada Deegaanka ee gobolka Shabeellaha Dhexe ay dileen laba hogaamiye oo ka tirsanaa kooxda Al-Shabaab.
Wasaaraddu waxay sheegtay in howlgalka lagu dilay labada horjooge uu ka dhacay deegaan ka tirsan gobolka Shabeellaha Dhexe, iyadoo ciidamada ay sidoo kale bartilmaameedsadeen xubno kale oo ka tirsan kooxda.
Sida lagu sheegay warbixinta Wasaaradda Gaashaandhigga, labada horjooge ayaa door muhiim ah ku lahaa howlaha kooxda Al-Shabaab ee ka socday gobolka.
Wasaaraddu ma bixin faahfaahin dheeraad ah oo ku saabsan goobta uu howlgalka ka dhacay ama tirada xubnaha kale ee lagu dilay, balse waxay sheegtay in ciidamada deegaanka ay sii wadi doonaan howlgallada ka dhanka ah Al-Shabaab.
Gobolka Shabeellaha Dhexe ayaa ka mid ah deegaannada ay ciidamada Soomaaliya iyo kuwa deegaanka ka wadaan howlgallo ay ku doonayaan inay Al-Shabaab uga saaraan deegaannada ay weli ku sugan yihiin.
