MUQDISHO, Soomaaliya — Itoobiya ayaa qorshaynaysa inay Soomaaliya kala baxdo in ka badan 3,000 askari, iyadoo dagaallada ka socda waqooyiga dalkaasi ay cadaadis ku saarayaan ciidamadeeda, sida ay sheegtay Bloomberg, inkastoo dowladda Soomaaliya ay sheegtay in aan loo soo gudbin wax ogeysiis rasmi ah.
Sida laga soo xigtay ilo xog-ogaal ah oo Bloomberg ay soo xigatay, ciidamada Itoobiya ayaa laga yaabaa inay Soomaaliya ka bilaabaan bixitaanka maalmaha ama toddobaadyada soo socda. Ilahaasi ayaa sheegay in qorshuhu aanu weli si rasmi ah loo shaacin.
Mas’uul ka tirsan Wasaaradda Gaashaandhigga Soomaaliya ayaa sheegay in Muqdisho aysan Itoobiya ka helin wax ogeysiis ah oo ku saabsan qorshe ciidamo looga saarayo Soomaaliya.
“Itoobiya nama soo gaarsiinin wax qorshe ah oo ku saabsan inay ciidamadeeda kala baxdo Soomaaliya. Haddii ay sidaas noo sheegaan, waan idinla socodsiin doonaa,” ayuu mas’uulkaasi sheegay.
Weli ma cadda in qorshaha la sheegay uu khuseeyo ciidamada Itoobiya ee ka tirsan Howlgalka Midowga Afrika ee Taageerada iyo Xasilinta Soomaaliya (AUSSOM), ciidamada Itoobiya ee ku jooga heshiisyo laba geesood ah, ama labada qayboodba.
Itoobiya waxay Soomaaliya ka joogtaa kumannaan askari, iyadoo qayb ka mid ah ciidamadeeda ay ku howlgalaan AUSSOM, halka kuwo kalena ay ku sugan yihiin gobollo ka tirsan koonfurta iyo bartamaha Soomaaliya. Ciidamada Itoobiya ayaa muddo dheer kaalin ka qaatay dagaalka lagula jiro Al-Shabaab iyo sugidda amniga deegaanno ku dhow xadka labada dal.
Warbixinta Bloomberg ayaa soo baxday xilli Itoobiya ay wajahayo dagaallo cusub oo ka socda waqooyiga dalka, gaar ahaan gobolka Tigray, halkaas oo ciidamada dowladda federaalka iyo xoogagga Tigray ay mar kale isku dhaceen. Dagaallada ayaa dib u soo cusboonaaday afar sano kadib heshiiskii Pretoria ee 2022 ee soo afjaray dagaalkii labada sano socday.
Xiisadda ayaa sii korortay kadib markii TPLF iyo kooxo kale oo hubeysan ay sameeyeen isbahaysi ka dhan ah dowladda Ra’iisul Wasaare Abiy Ahmed. Wararka laga helayo Itoobiya ayaa sidoo kale sheegaya in dagaalladu ku fideen qaybo ka mid ah gobollada Tigray, Amhara iyo Afar.
Haddii qorshaha ka bixitaanka Itoobiya uu hirgalo, waxaa soo baxaya su’aalo ku saabsan cidda buuxin doonta saldhigyada iyo goobaha ay ciidamada Itoobiya ka baxaan, gaar ahaan meelaha ay ciidamadaasi muddo dheer ka howlgaleen.
Arrintan ayaa sidoo kale imaanaysa wax yar kadib kulan ay Addis Ababa ku yeesheen Madaxweyne Xasan Sheekh Maxamuud iyo Ra’iisul Wasaare Abiy Ahmed. Labada dhinac waxay ka wada hadleen xiriirka labada dal iyo arrimaha siyaasadda iyo amniga ee gobolka Geeska Afrika, balse ma jirin war rasmi ah oo sheegayay in kulanka looga hadlay qorshe ciidamo Itoobiyaan looga saarayo Soomaaliya.
AUSSOM ayaa horraantii Sebtembar sheegtay in ciidamada Itoobiya ee ka howlgala Sector 4 ay sameeyeen wareeg ciidan, iyadoo askar cusub ay beddeleen ciidamo muddo saddex sano ah ka tirsanaa howlgalka.
Ilaa hadda, Soomaaliya, Midowga Afrika iyo Itoobiya si rasmi ah uma shaacin isbeddel ku yimid tirada ciidamada Itoobiya ee Soomaaliya.
