Madaxweyne Xasan Sheekh oo Imaaraadka ku eedeeyay faragelin ka dhan ah madax-bannaanida Soomaaliya

0

Muqdisho – Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa khudbad uu xalay u jeediyay shacabka Soomaaliyeed kaga hadlay xaaladda dalka, isagoo si gaar ah diiradda u saaray eedeymo la xiriira faragelin uu sheegay in Dowladda Imaaraadka Carabta ay ku heyso arrimaha gudaha ee Soomaaliya.

 

Madaxweynaha ayaa Imaaraadka ku eedeeyay inay faragelin ku sameynayso siyaasadda gudaha ee Soomaaliya, isla markaana ay taageero siyaasadeed, dhaqaale iyo mid militari siiso dhinacyo ka soo horjeeda Dowladda Federaalka, taas oo uu sheegay inay khatar ku tahay midnimada, madax-bannaanida iyo amniga qaranka.

Isagoo ka hadlayay arrimahaas, ayuu Madaxweynaha yiri:

“Imaaraatka waxay tageen Liibiya iyo Yemen, waxayna ka soo tageen iyagoo kala qeybsan. Maanta Soomaaliya iyo Suudaan ayay sidaas la doonayaan.” Wuxuu intaas ku daray in Soomaaliya maanta aysan ahayn dowladdii tabarta yareyd ee hore loo maleyn jiray, isagoo digniin u diray dowladda Imaaraadka.

“Imaaraatka waxaan u sheegayaa, Soomaaliya maanta ma aha Soomaaliyadii shalay ee la moodayay inay daciif tahay. Haddii aad waddadan qaloocan ku sii socotaan, Soomaaliya waa difaacan doontaa dalkeeda,” ayuu yiri Madaxweyne Xasan Sheekh.

Madaxweynaha ayaa sheegay in Imaaraadka Carabta ay Soomaaliya ka wado dagaal wakiil ah, isagoo ku eedeeyay inay heshiisyo dekedeed si toos ah ula gashay qaar ka mid ah dowlad-goboleedyada, isla markaana ay taageero dhaqaale iyo mid siyaasadeed siiso dhinacyo uu sheegay inay ka hor imaanayaan dowladda dhexe.

Sidoo kale, Xasan Sheekh ayaa ku eedeeyay Imaaraadka inay hub siisay maleeshiyaad, dhistay saldhigyo militari, isla markaana ay sameysay ciidamo ka baxsan taliska iyo maamulka dowladda federaalka, isaga oo sheegay in tallaabooyinkaas ay wiiqayaan awoodda dowladda iyo amniga qaranka.

Madaxweynuhu wuxuu xusay in tallaabooyinka noocaas ah ay Soomaaliya ka dhigayaan dal ay awoodaha shisheeye saameyn ku yeeshaan go’aannadiisa gudaha, taas oo uu ku tilmaamay mid aan la aqbali karin.

Wuxuu sheegay in dowladda Soomaaliya ay arrimahan kala hadashay dhinaca diblomaasiyadda, iyadoo dirtay farriimo rasmi ah, isla markaana ay weli diyaar u tahay wadahadal lagu xalliyo khilaafka, haddii Imaaraadku ixtiraamo madax-bannaanida siyaasadeed iyo midnimada dhuleed ee Soomaaliya.

Khilaafka labada dal ayaa sii xoogeysanayay tan iyo markii Dowladda Federaalka Soomaaliya bishii Janaayo ku dhawaaqday inay burisay heshiisyadii ay la lahayd Imaaraadka Carabta, kuwaas oo ay ku jireen heshiisyada iskaashiga amniga iyo kuwa la xiriira maareynta saddex dekedood oo Soomaaliyeed.

Dhanka kale, Imaaraadka Carabta ayaan weli wax jawaab rasmi ah ka soo saarin eedeymaha cusub ee Madaxweynaha Soomaaliya. Khudbadda Madaxweyne Xasan Sheekh ayaa kusoo beegmeysa xilli ay taagan yihiin xiisado siyaasadeed iyo diblomaasiyadeed oo la xiriira madax-bannaanida dalka, heshiisyada dekedaha iyo doorka dowladaha shisheeye ee arrimaha gudaha Soomaaliya.

LEAVE A REPLY

Please enter your comment!
Please enter your name here