Antalya – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa magaalada Antalya ee dalka Turkiga kula kulmay Wasiirka Arrimaha Dibadda ee Masar, Dr. Badr Cabdilcaati, halkaas oo ay kaga wada hadleen xoojinta xiriirka iyo iskaashiga labada dal.
Kulankan ayaa ka dhacay Madasha Diblomaasiyadda Antalya, oo ay ka qeyb galeen madax iyo diblomaasiyiin ka kala socday dalal kala duwan, isla markaana diiradda lagu saaray arrimaha iskaashiga gobolka iyo xasilloonida Geeska Afrika.
Intii uu kulanku socday, Madaxweynaha Soomaaliya ayaa ka guddoomay Wasiirka Arrimaha Dibadda ee Masar salaanta uu ka siday Madaxweynaha Masar, Cabdulfataax Al-Sisi.
Dhanka kale, Madaxweyne Xasan Sheekh Maxamuud ayaa dhankiisa codsaday in la gaarsiiyo salaanta Madaxweynaha Masar, isagoo muujiyay mahadnaq ku aaddan taageerada joogtada ah ee Qaahira ay siiso Muqdisho.
Madaxweynaha Soomaaliya ayaa sidoo kale adkeeyay in Somalia ay ka go’an tahay sii xoojinta iskaashiga Masar, si loo horumariyo danaha labada dal loona taageero amniga iyo xasilloonida gobolka Geeska Afrika.
Wasiirka Arrimaha Dibadda ee Masar ayaa dhankiisa xaqiijiyay in Qaahira ay sii wadi doonto taageerada ay siiso Soomaaliya, gaar ahaan dhinacyada siyaasadda, amniga, militariga iyo gargaarka bani’aadantinimo.
Wuxuu sidoo kale ammaanay xiriirka taariikhiga ah ee labada dal, isagoo sheegay in Masar ay muhiimad gaar ah siiso midnimada iyo madax-bannaanida Soomaaliya, iyo ilaalinta hay’adaha dowliga ah.
Intii uu kulanku socday, Masar ayaa si adag u diiday tallaabo kasta oo ay ku tilmaantay mid wax u dhimaysa midnimada Soomaaliya ama madax-bannaanideeda. Waxay sidoo kale cambaareysay aqoonsiga Israel ee Somaliland iyo magacaabista wakiil diblomaasiyadeed, iyadoo ku tilmaamtay arrintaas mid ka hor imanaysa sharciga caalamiga ah iyo mabaadi’da Midowga Afrika.
Kulankan ayaa kusoo beegmaya xilli Soomaaliya ay sii kordhinayso xiriirka ay la leedahay dalalka gobolka iyo kuwa caalamiga ah, iyadoo diiradda lagu saarayo amniga, dib u dhiska, iyo xasilloonida dalka.
